Hihancki barščeŭnik razrośsia ŭ miežach Minska
Jak paviedamiła Ministerstva pryrodnych resursaŭ i achovy navakolnaha asiarodździa Biełarusi, u krainie płanujecca źniščyć hihancki barščeŭnik na bolš jak 1,6 tysiačy miescach jaho rostu.
Adznačajučy razmach, ź jakim barščeŭnik raśsiejaŭsia pa Biełarusi, u Minpryrody paviedamili,
što «tolki ŭ Minsku hetaja raślina zajmaje 129 hiektaraŭ».
Karespandent BiełaPAN vyjaviŭ zaraśnik atrutnaj raśliny ŭ mikrarajonie Kurasoŭščyna na vulicy Asanalijeva. Raślina ŭščylnuju padstupaje da škoł №11 i 62, a taksama dziciačaha sadka №354.
Jak paviedamiŭ načalnik śpiecinśpiekcyi dziaržkantrolu za vykarystańniem i achovaj ziamiel, raślinnaha śvietu, lasoŭ i łandšaftaŭ Minpryrody Uładzimir Saŭčanka, samy niebiaśpiečny vid raśliny — barščeŭnik Sasnoŭskaha — dasiahaje troch‑čatyroch mietraŭ u vyšyniu. Jon vałodaje vielizarnaj žyćciazdolnaściu — adna raślina daje bolš za tysiaču štuk nasieńnia. Dla čałavieka barščeŭnik niebiaśpiečny tym, što vyklikaje alerhičnyja reakcyi. Traplańnie soku raśliny na skuru i ślizistyja vyklikaje mocnyja apioki.
Kali vy vypadkova apiaklisia barščeŭnikam, nieabchodna pramyć paškodžanaje miesca vadoj i nieadkładna źviarnucca ŭ najbližejšuju miedycynskuju ŭstanovu pa dapamohu.