Biełarusaŭ adpraŭlajuć na «sutki» za lubuju biełaruskuju simvoliku, znojdzienuju pamiežnikami
Za apošnija dva miesiacy sudy Bresta, Kobryna i Vierchniadźvinska asudzili minimum šeść biełarusaŭ, jakija nibyta pikietavali padčas pierasiačeńnia biełaruskaj miažy. Padstavaj dla pratakołaŭ była BČB-simvolika, jakuju znachodziać supracoŭniki biełaruskaj mytni padčas ahladu mašyn, paviedamlajuć pravaabaroncy.
Potym jany paviedamlajuć pra heta ŭ milicyju. Viadoma, što čaściej za ŭsio skarhi na bieła-čyrvona-biełuju simvoliku pastupajuć z punktu propusku «Kazłovičy» na biełaruska-polskaj miažy.
U RAUSach na kiroŭcaŭ składajuć pratakoły pa art. 24.23 KaAP za «niesankcyjanavanaje pikietavańnie», navat kali vympieł z BČB-ściaham i Pahoniaj raźmieščany ŭnutry kabiny za siadzieńniem kiroŭcy.
Jak vynikaje z rapartu pamiežnicy na łatvijska-biełaruskaj miažy, «jana ŭ adpaviednaści sa svaimi słužbovymi instrukcyjami stała ahladać kabinu aŭtamabila i pry ahladzie na bakavoj ścianie z boku siadzieńnia kiroŭcy zaŭvažyła vympieł u vyhladzie bieła-čyrvona-biełaha koleru i hierbam Pahonia pamieram 8 na 15 santymietraŭ, jon nie byŭ schavany i byŭ dastupny dla ahladu». Za hetaje «pravaparušeńnie» sud Vierchniadźvinskaha rajona 1 krasavika pakaraŭ kiroŭcu 10-sutačnym aryštam.
Sud Kobrynskaha rajona 17 sakavika aštrafavaŭ kładaŭščyka na 960 rubloŭ (30 bazavych vieličyniaŭ) taksama za vympieł u bieła-čyrvona-biełych kolerach.
U Breście ciaham miesiaca asudzili čatyroch kiroŭcaŭ. Na traich skłali pratakoły za BČB-vympieły, jašče na adnaho — za stužku na škle aŭtamabila. Spravy razhladali ŭ sudzie Leninskaha rajona Bresta. Im pryznačyli štrafy ŭ pamiery ad 960 da 1 600 rubloŭ (ad 30 da 50 bazavych vieličyniaŭ).
U studzieni pravaabaroncam staŭ viadomy pieršy vypadak, kali biełarusa asudzili za «pikietavańnie» na miažy. Tady kiroŭcu-mižnarodnika Alaksandra Krejdziča brescki sudździa Andrej Hruško aštrafavaŭ na 1 280 rubloŭ (40 bazavych vieličyniaŭ). Jaho pryznali vinavatym u pikietavańni dźviuma nielepkami z Pahoniaj, jakija supracoŭniki mytni zaŭvažyli na škle aŭtamabila.