Sienat Čechii pryznaŭ złačynstvy rasijskaj armii va Ukrainie hienacydam ukrainskaha naroda
Pra pryniataje češskim Sienatam rašeńnie paviedamiŭ u Twitter ambasadar Ukrainy ŭ Prazie Jaŭhien Pierabijnis.
Ambasadar, u pryvatnaści, napisaŭ:
«Češski Sienat pryznaŭ złačynstvy, jakija rasijskaja armija ździajśniaje va Ukrainie, hienacydam ukrainskaha naroda. U pryniataj pastanovie taksama ŭtrymlivajecca padtrymka dalejšaha nadańnia Čechijaj Ukrainie zbroi i atrymańnia Ukrainaj statusu kandydata na siabroŭstva ŭ Jeŭrasajuz».
Češskija sienatary zajavili, što Rasija va Ukrainie hruba parušaje mižnarodnaje humanitarnaje prava i mižnarodnyja kanviencyi. Sienat asudziŭ šmatlikija vajennyja złačynstvy, učynienyja Rasijaj va ŭkrainskich haradach, takich jak Buča, Baradzianka, Irpień i Maryupal, jakija śviedčać pra teror suprać nasielnictva, masavyja pakarańni i departacyi sotniaŭ tysiač čałaviek.
Sienat asudziŭ etnična matyvavanyja złačynstvy suprać čałaviectva, jakija Rasija ździajśniaje sistemna i maštabna, zajaŭlajučy, što jany źjaŭlajucca prajavami hienacydu suprać ukrainskaha naroda.
Sienat Čechii — nie pieršy parłamient, jaki pryniaŭ padobnaje rašeńnie. Da hetaha zajavy ab pryznańni dziejańniaŭ Rasii va Ukrainie hienacydam pryniali parłamienty Kanady i troch krain Bałtyi — Litvy, Łatvii i Estonii.