ES i Vialikabrytanija damovilisia ab zabaronie strachavać tankiery z rasijskaj naftaj. Heta źmienšyć mahčymaści ekspartu
Vialikabrytanija i Jeŭraźviaz uzhadnili zabaronu na strachavańnie rasijskich sudnaŭ z naftaj, piša The Financial Times. Zabarona pazbavić pieravozčykaŭ rasijskaj nafty dostupu na brytanski rynak strachavańnia Lloyd's of London — najbujniejšy dla marskich pieravozak.
Takim čynam, adznačaje vydańnie, u Rasii skarociacca mahčymaści ekspartu nafty-syrca pa mory, joj daviadziecca źviartacca da mienš nadziejnych strachaŭščykoŭ.
Zabarona na strachavańnie marskich pieravozak rasijskaj nafty uvachodzić u šosty pakiet sankcyj Jeŭrasajuza, pra ŭzhadnieńnie jakoha było abvieščana 31 maja. Adnak biez padtrymki z boku Vialikabrytanii, u jurysdykcyi jakoj znachodzicca Lloyd's of London, hetaja zabarona faktyčna nie pracavała b.
Pa dadzienych krynic FT, pradstaŭniki brytanskaha rynku strachavych pasłuh vystupali suprać embarha. U pryvatnaści, jany źviartali ŭvahu, što budzie składana dakładna vyznačyć pachodžańnie nafty, jakuju pieravoziać sudny, što vychodziać z rasijskich partoŭ. Praz party ŭ Rasii, skazała adna z krynic vydańnia, iduć, naprykład, pastaŭki nafty z Kazachstana, jakija nie abmiežavanyja jakimi-niebudź sankcyjami.
Zabarona na strachavańnie marskich pieravozak rasijskaj nafty, adznačaje vydańnie, moža pryvieści da jašče bolšaj niavyznačanaści na suśvietnych rynkach. Biržavyja ceny nafty i tak užo vyraśli da dvuchmiesiačnaha maksimumu paśla taho, jak Jeŭrasajuz abviaściŭ ab častkovym embarha na pastaŭki z Rasii.
Na dumku apytanych naftatrejdaraŭ i sudnaŭładalnikaŭ, zabarona jeŭrapiejskim kampanijam strachavać tankiery z rasijskaj naftaj stanie surjoznaj finansavaj zbrojaj. Mała chto navažycca transpartavać naftu biez strachoŭki, ličać ekśpierty.