Žycharu Lelčyc, jaki rehularna źbivaŭ svaju padčarku, dali dva hady chimii
Sud Lelčyckaha rajona 26 maja razhledzieŭ kryminalnuju spravu ŭ dačynieńni da 25-hadovaha žychara rajcentra, jakoha abvinavačvali ŭ katavańni jahonaj maleńkaj padčarki.
Viadoma, što chłopiec sa žniŭnia 2021-ha pa studzień 2022 hoda ŭ domie sistematyčna nanosiŭ paboi piacihadovaj dziaŭčyncy. Jon biŭ jaje rukami, remieniem, šturchaŭ jaje, chapaŭ za ruki, za šyju, biŭ hałavoj ab ścianu. Pry hetym mužčyna ŭśviedamlaŭ, što ŭ siłu fizičnaha i psichičnaha raźvićcia dzicia nie moža jamu supraćstajać, ale praciahvaŭ źbivać, paviedamlaje pres-słužba Viarchoŭnaha suda.
Na ščaście, istotnych cialesnych paškodžańniaŭ (ciažkich albo mienš ciažkich) dziaŭčynka nie atrymała.
Mužčyna pryznany vinavatym u katavańni pavodle č. 2 art. 154 KK. Jamu pryznačanaje pakarańnie ŭ vyhladzie dvuch hadoŭ abmiežavańnia voli z nakiravańniem u papraŭčuju ŭstanovu adkrytaha typu («chimija»). Prysud jašče moža być abskardžany.