Iłan Mask pastaviŭ ultymatum supracoŭnikam Tesla: albo viartańnie ŭ ofis, albo zvalnieńnie
Hienieralny dyrektar Tesla choča całkam admovicca ad addalenaj pracy, uviedzienaj praz pandemiju kavidu, piša Bloomberg.
Iłan Mask. Fota Wikimedia
Na hetym tydni Iłan Mask adpraviŭ list z zaklikam, jaki nie cierpić piarečańniaŭ, da ŭsich supracoŭnikaŭ kampanii pa vytvorčaści elektramabilaŭ.
«Kožny ŭ Tesla pavinien pravodzić u ofisie nie mienš za 40 hadzin na tydzień», — napisaŭ Mask u liście. «Da taho ž, ofis pavinien być tam, dzie vašy kalehi, a nie niejki addaleny psieŭdaofis. Kali vy nie źjaviciesia na pracy, my budziem ličyć, što vy zvolnilisia».
Mask tłumačyć, što čym vyšej pazicyja supracoŭnika, tym bolš zaŭvažnaj pavinna być jaho prysutnaść. Kab kožny moh bačyć, jak pracuje kiraŭnik pobač ź im.
«Kali b ja tak nie rabiŭ, Tesla b daŭno zbankrutavała», — piša Iłan.
Što da kampanij, jakija nie zaklikajuć viartacca ŭ ofis, to Mask sa skiepsisam aceńvaje ich pracu. «Kali jany apošni raz vypuskali vybitny novy pradukt?» — pytaje jon.
Iłan zajaŭlaje, što jaho kampanija i nadalej budzie stvarać samyja nievierahodnyja pradukty ŭ śviecie, ale zaŭvažaje, što «hetaha nie adbudziecca, kali vy budziecie zvanić pa telefonie».
U «Tvitary» stvaralnika Tesla mocna raskrytykavali, abvinavaciŭšy ŭ niepavažlivym staŭleńni da supracoŭnikaŭ i zavyšanych patrabavańniach.
«Ja ŭvohule fanat Iłana», ale «minimum 40 hadzin na tydzień»? U majoj biednaj jeŭrapiejskaj krainie 40 hadzin na tydzień — heta maksimum, kolki vy možacie pracavać. Kab pracavać bolš, patrebna, kab vaš kiraŭnik paprasiŭ pra heta ŭ piśmovaj formie (i dapłaciŭ vam), a vy pavinny zahadzia zhadzicca na heta. Napeŭna, heta «dziki zachad», — prakamientavaŭ novaŭviadzieńnie adzin z karystalnikaŭ.
«Hety list žachliva nieprafiesijny. Kali vy prymusicie vašaha supracoŭnika adčuvać, što jon ničoha nie značyć i jaho možna lohka zamianić, heta ŭrešcie rešt vierniecca vam bumieranham. Ja b nie chacieŭ pracavać u takoj kampanii», — napisaŭ inšy.
Ale jość i tyja, chto ŭchvalajuć dziejańni Iłana: «Jon pracavaŭ, i pracavaŭ šmat, kab być tym, kim jon jość ciapier. Jon kiraŭnik i moža rabić toje, što choča».