Łožki — u try jarusy. U jakich umovach vikipiedyst Biernštejn pravioŭ try miesiacy da suda
Na hetym tydni vikipiedystu Marku Biernštejnu prysudzili try hady chatniaj chimii. Mužčynu abvinavačvali ŭ «hrubym parušeńni hramadskaha paradku». Prajektu «1906» stała viadoma pra ŭmovy, u jakich Biernštejn znachodziŭsia ŭ SIZA.
Mark Biernštejn — papularyzatar ruskamoŭnaj «Vikipiedyi», aŭtar bolš za 200 tysiač pravak i artykułaŭ, u tym liku pra Chałakost i historyju SSSR.
Pačaŭ zajmacca «Vikipiedyjaj» Mark u 2008 hodzie. Mužčyna ŭbačyŭ konkurs dla vikipiedystaŭ i vyrašyŭ u im paŭdzielničać. Z tych časoŭ heta stała jaho lubimym chobi.
Pracuje Mark načalnikam adździeła ŭ biełaruska-rasijskaj IT-kampanii. Prablem z pracaj paśla aryštu ŭ mužčyny nie ŭźnikła, kiraŭnictva praciahnuła ź im kantrakt.
10 sakavika Biernštejna deananimizavali ŭ rasijskim telehram-kanale «Miratvorac», 11 sakavika takuju ž infarmacyju apublikavaŭ biełaruski kanał, nabližany da siłavikoŭ. Praź dźvie hadziny paśla hetaha Marka aryštavali — abvinavacili pa artykule 342 KK.
U kamiery na Vaładarcy, u jakoj siadzieŭ Biernštejn, było drennaje aśviatleńnie, čytać knihi nie atrymlivałasia. Mužčyna źjaŭlajecca invalidam pa zroku, za try miesiacy źniavoleńnia jon u jaho značna pahoršaŭ.
Kamiera była pierapoŭniena. U SIZA №1 pastupaje dastatkova šmat ludziej, vidać, nie ŭsim chapaje miesca, tamu ŭ kamierach łožki stajać u try jarusy.
Biernštejn siadzieŭ u adnoj kamiery ź Jaŭhienam Rubaškam, aktyvistam anarchičnaha ruchu, jakomu prysudzili 5 hadoŭ pazbaŭleńnia voli ŭ kałonii ahulnaha režymu.
Z ulikam adsiedžanych troch miesiacaŭ u SIZA Marku Biernštejnu zastaniecca adbyć 2,5 hoda chatniaj chimii.
Prajektu «1906» taksama stała viadoma, što ŭ dadzieny momant mužčyna nie adčuvaje siabie ŭ biaśpiecy.