U Estonii chočuć demantavać usie savieckija vajskovyja pomniki
Padčas pres-kanfierencyi ŭ Talinie premjer-ministarka Estonii Kaja Kałas skazała, što savieckich pomnikaŭ, jakija treba prybrać, u krainie naličvajecca ad 200 da 400. Heta bolš, čym dumałasia raniej. Ale savieckija vajskovyja manumienty pavinny być vydalenyja z publičnaj prastory, heta vyrašana, adznačyła premjer-ministr.
Pomnik-tank u Narvie. Fota: Ilja Smirnov / Põhjarannik
Kali ŭ kahości pomnik staić na pryvatnaj terytoryi, to ŭładalnik moža prybrać jaho samastojna, dla hetaha dazvołu nie patrabujecca, adznačyła Kałas.
Asobna jana zakranuła pytańnie pomnika-tanka ŭ horadzie Narva, dzie pieravažaje ruskamoŭnaje nasielnictva:
«Važna padkreślić toje, što my ŭžo padkreślivali 9 maja: šanavać pamiać zahinułych nie zabaroniena. Ale heta treba rabić tam, dzie dla hetaha padychodziačaje miesca, to-bok na mohiłkach, dzie heta možna zrabić z zachavańniem hodnaści. A tank — heta pryłada zabojstva. Heta nie pamiatny abjekt. Takimi tankami zaraz na vulicach Ukrainy zabivajuć ludziej. Pad im navat niama vajskovych pachavańniaŭ.
Kančatkovaja meta jasnaja: prybrać jak tank u Narvie, tak i inšyja čyrvonaarmiejskija manumienty z tych miescaŭ, dzie jany znachodziacca ciapier. Urad u hetym pytańni prytrymlivajecca adzinaha mierkavańnia», — zajaviła kiraŭnik urada.
Dakładnaha hrafika demantažu pakul niama, bo «važna, kab napružańnie nie narastała ni ŭ hetym rehijonie, ni ŭ inšych miescach». «Pry demantažy manumientaŭ my pavinny zabiaśpiečyć, kab paśla hetaha Narva zastałasia mientalna z nami. Narva — heta važny horad, jaki pavinien być u nadziejnych rukach», — adznačyŭ prysutny na pres-kanfierencyi ministr unutranych spraŭ Estonii Łaŭry Laeniemiets.
Ale i zaciahvać z hetaj spravaj nie źbirajucca: «Paviercie nam, my chočam zrabić heta jak maha chutčej, jak maha bolš biazbolna, ź minimalnaj eskałacyjaj». Ale pry hetym Laeniemiets udakładniŭ, što heta nie značyć, što demantaž adbudziecca siońnia-zaŭtra pad pokryvam nočy, dla hetaha nieabchodna vyrašyć šerah pytańniaŭ.