«RIA Novosti» apublikavała hutarku z mužčynam, jakoha nazvała baćkam Natalli Voŭk
Tvar u mužčyny na videa schavany, dzie jon žyvie nie nazyvajecca. Ale «RIA Novosti» śćviardžaje, što heta baćka Natalli Voŭk — pa viersii rasijskich śledčych, jana ździejśniła zabojstva dački Duhina, ideołaha «ruskaha śvietu».
Skryn videa
Mierkavany baćka Natalli śćviardžaje, što žančyna była ŭciakačkaj, «jeździła ŭ Francyju». Tam joj nie spadabałasia, jana viarnułasia «ŭ Polšču nibyta», a z Polščy — va Ukrainu.
Pavodle jaho, apošni raz dačka vychodziła ź im na suviaź «niedzie dni try-čatyry tamu. Dyjałoh byŭ: «Jak spravy?» — «Usio narmalna, usio narmalna».
Tady Natalla nibyta skazała, što znachodzicca ŭ Litvie.
Taksama mužčyna raspavioŭ, što jana niekali (daty nie nazyvalisia) słužyła va Uzbrojenych siłach Ukrainy, ale nie ŭ bataljonie «Azoŭ», i nibyta zvolniłasia sa słužby pa stanie zdaroŭja. Pavodle jaho, žančynie zrabili apieracyju z-za puchliny hałaŭnoha mozha, paśla jakoj jana stała inšaj, bolš aktyŭnaj.
Čałaviek za kadram spytaŭ, ci praktykavałasia Natalla Voŭk u abychodžańni sa zbrojaj i vybuchovymi rečyvami. Mierkavany baćka adkazaŭ, što pavodle Natalli, «ich na palihon vazili». Ale jon nie viedaje, ci stralali jany tam.
Dzie i kali źniataje videa, nieviadoma. Jak i niama dokazaŭ taho, što heta sapraŭdy baćka Natalli.
Aŭtamabil z Darjaj Duhinaj byŭ uzarvany ŭviečary 20 žniŭnia ŭ rajonie pasiołka Vialikija Viaziomy Maskoŭskaj vobłaści. Žančyna zahinuła na miescy.
22 žniŭnia FSB zajaviła, što raskryła zabojstva Darji Duhinaj. Pavodle słužby, vykanaŭcaj źjaŭlajecca «hramadzianka Ukrainy Voŭk Natalla Paŭłaŭna, 1979 h. n., jakaja prybyła ŭ Rasiju 23 lipienia 2022 hoda razam z dačkoj Šaban Safijaj Michajłaŭnaj, 2010 h. n.».
Adkaznaść za zabojstva Duhinaj taksama ŭziała na siabie tak zvanaja «Nacyjanalnaja respublikanskaja armija», pra jakuju dahetul nie było ničoha viadoma.