Jeŭraparłamient prysudziŭ premiju Sacharava ŭkrainskamu narodu i Uładzimiru Zialenskamu
Kiraŭnik Jeŭraparłamienta Robierta Miecoła adznačyła ŭ svaim tvitary, što Zialenski i ŭkrainski narod adstojvajuć toje, u što vierać, zmahajucca za jeŭrapiejskija kaštoŭnaści i ryzykujuć žyćciom dziela ŭsich jeŭrapiejcaŭ.
«Chrabramu ŭkrainskamu narodu, jakoha pradstaŭlaje prezident krainy, abranyja lidary i hramadzianskaja supolnaść», — havorycca ŭ zajavie Jeŭraparłamienta z arhumientacyjaj prysudžeńnia premii.
Premija Sacharava — hałoŭnaja ŭznaharoda Jeŭrapiejskaha Sajuza ŭ halinie pravoŭ čałavieka. Jeŭraparłamient uručaje jaje štohod z 1988 hoda. U 2004 hodzie łaŭreatam hetaj premii była Biełaruskaja asacyjacyja žurnalistaŭ.
U śpisie naminantaŭ 2022 hoda byli taksama zasnavalnik sajta WikiLeaks Džulijan Asanž, Kałumbijskaja kamisija pa ŭstanaŭleńni iściny, brazilskaja aktyvistka Sonia Huažažara i žurnalistka telekanała Al Jazeera Šyryn Abu Akle, jakaja zahinuła ŭ mai 2022 hoda.