«Rasiejcy časta abvinavačvajuć inšych u tym, što płanujuć sami». Ukrainskija ŭłady adreahavali na słovy Šajhu pra «brudnuju bombu»
Ministr abarony Rasii Siarhiej Šajhu siońnia pravioŭ razmovy sa svaimi francuzskim, tureckim i brytanskim kalehami i, jak vynikaje z aficyjnych paviedamleńniaŭ, davioŭ «svaje zakłapočanaści z nahody mahčymych pravakacyj z boku Ukrainy z vykarystańniem «brudnaj bomby». Ułady Ukrainy prakamientavali hetuju lehiendu kramloŭskaj prapahandy.
«Chłuśnia Rasii pra nibyta płany Ukrainy ŭžyć «brudnuju bombu» nastolki absurdnaja, nakolki niebiaśpiečnaja. Pa-pieršaje, Ukraina źjaŭlajecca adkaznym bokam Damovy ab nieraspaŭsiudžvańni jadziernaj zbroi: my nie majem nijakich «brudnych bombaŭ» i nie płanujem ich mieć. Pa-druhoje, rasiejcy časta abvinavačvajuć inšych u tym, što płanujuć sami», — napisaŭ ministr zamiežnych spraŭ Ukrainy Dźmitryj Kuleba ŭ tvitary.
U viečarovym zvarocie z hetaj nahody vykazaŭsia i Uładzimir Zialenski.
Fota: Ron Haviv, ronhaviv_vii / Twitter
«Kali siońnia rasijski ministr abarony ładzić telefonnuju karusiel i abzvońvaje zamiežnych ministraŭ z apoviedami pra tak zvanuju «brudnuju» jadziernuju bombu, usie ŭsio dobra razumiejuć. Razumiejuć, chto źjaŭlajecca krynicaj ŭsiaho brudnaha, što možna tolki ŭjavić u hetaj vajnie», — vykazaŭsia jon.
«Kali chtości i moža ŭžyć jadziernuju zbroju ŭ našaj častcy Jeŭropy, to heta tolki adzin subjekt — i hety subjekt jakraz i zahadaŭ tavaryšu Šajhu kudyści tam telefanavać, — dadaŭ Zialenski.
Liču, što ciapier śviet pavinien maksimalna stroha adreahavać. Kali Rasija padrychtavała čarhovaje ŭźniaćcie stavak i čarhovy eskałacyjny krok — jana ŭžo ciapier, previentyŭna i da luboha novaha svajho «brudu», pavinna ŭbačyć, što śviet heta nie prahłynie».