Zialenski ŭžo lacić u ZŠA
Niekalki amierykanskich vydańniaŭ, u tym liku Si-en-en i Axios, abviaścili ŭviečary ŭ aŭtorak, što prezident Ukrainy Uładzimir Zialenski ŭ sieradu prylacić u Vašynhton, dzie vystupić pierad Kanhresam i sustreniecca z prezidentam ZŠA Džo Bajdenam.
Paźniej, kali ŭ Jeŭropie ŭžo była hłybokaja noč, telekampanija Si-en-en paviedamiła sa spasyłkaj na dźvie ananimnyja krynicy, što Zialenski ŭžo lacić u ZŠA.
Zialenski paćvierdziŭ, što lacić u Vašynhton.
Uładzimir Zialenski ŭsiu vajnu pravioŭ va Ukrainie i prymaŭ zamiežnych palitykaŭ u Kijevie albo vystupaŭ pierad imi pa videasuviazi. Kali infarmacyja pra vizit u ZŠA paćvierdzicca, heta budzie pieršaja pajezdka ŭkrainskaha prezidenta za miažu z 24 lutaha.
Si-en-en paviedamlaje, spasyłajučysia na ananimnych surazmoŭcaŭ, što amierykanskija kanhresmieny čakajuć vystupu Zialenskaha, ale kančatkovaj jasnaści, ci adbudziecca jon, pakul niama.
Śpikier Pałaty pradstaŭnikoŭ Nensi Pełosi na pytańnie žurnalistaŭ, ci zaprošany Zialenski ŭ Kapitolij, adkazała: «Nie. My pakul nie viedajem, ci zmoža jon».
Pry hetym Pełosi razasłała deputatam list, u jakim paprasiła ich abaviazkova prysutničać u sieradu na pasiadžeńni Pałaty pradstaŭnikoŭ. Si-en-en tłumačyć, što pierad kaladnymi vakacyjami mnohija kanhresmieny mohuć prapuskać pasiadžeńni, i zała moža akazacca paŭpustoj.
U aŭtorak viečaram na staroncy Ministerstva abarony Turcyi ŭ «fejsbuku» źjaviłasia videa, apisanaje jak vylet dvuch transpartnych samalotaŭ z kijeŭskaha aeraporta «Baryspal».
Rehularnyja rejsy va Ukrainu spynilisia jašče da 24 lutaha. Z taho času bolšaść pieravozak u krainu, jak hruzaŭ, tak i pasažyraŭ, ažyćciaŭlajecca pa ziamli praz zachodniuju miažu. Mienavita takim šlacham u krainu pryjazdžali ŭsie šmatlikija vysokapastaŭlenyja hości.