U Adesie demantavali pomniki Kaciarynie II i Suvoravu
Kamunalnyja słužby ŭ Adesie zaviaršyli demantaž pomnikaŭ rasijskaj impieratrycy Kaciarynie II i pałkavodcu Alaksandru Suvoravu, jakija stajali ŭ centry horada.
30 listapada deputaty haradskoj rady Adesy prahałasavali za demantaž i pieranos pomnika Kaciarynie II i jaje paplečnikam (pomnik zasnavalnikam Adesy), a taksama manumienta Suvoravu. U pačatku listapada za pieranos pomnika prahałasavali žychary horada.
Kiraŭnik Adeskaj abłasnoj vajennaj administracyi Maksim Marčanka ŭ noč na čaćvier padziakavaŭ žycharam Adesy, jakija vykazali svaju pazicyju ŭ adnosinach da rasijskaj impierskaj spadčyny.
«Siońnia adbyłasia sapraŭdy histaryčnaja padzieja. Narešcie, pomnik rasijskaj impieratrycy Kaciarynie ŭ Adesie byŭ demantavany», — napisaŭ Marčanka.
Paśla napadu Rasii na Ukrainu ŭkrainskija harady pačali aktyŭna pazbaŭlacca nie tolki ad savieckich nazvaŭ i pomnikaŭ, što jany rabili ŭ davajennyja hady, ale i naohuł ad nazvaŭ i pomnikaŭ, źviazanych z Rasijaj.
Pomnik impieratrycy Kaciarynie II, rasparadžeńniem jakoj u 1794 hodzie była zasnavana Adesa, i jaje paplečnikam byŭ pastaŭleny ŭ 1900 hodzie pa prajekcie architektara Juryja Dźmitryjenki, a paśla revalucyi, u 1920 hodzie, demantavany. Jaho adnavili tolki ŭ 2007 hodzie.