Za abrazu supracoŭnikaŭ milicyi minčuku prysudzili hod «chatniaj chimii» i šeść tysiač rubloŭ kampiensacyi maralnaj škody
U sudzie Biarozaŭskaha rajona 6 śniežnia byŭ vyniesieny prysud žycharu Minska Ramanu Koržyku, jakoha abvinavacili ŭ abrazie pradstaŭnikoŭ ułady — šaści supracoŭnikaŭ milicyi (art. 369 Kryminalnaha kodeksa), paviedamlaje «Viasna».
Sud Biarozaŭskaha rajona
Spravu razhladała sudździa Natalla Vakulčyk.
Ramana Koržyka zatrymali 28 vieraśnia 2022 hoda na troje sutak, zatym jon znachodziŭsia pad padpiskaj ab niavyjeździe.
Pa materyjałach abvinavačańnia, Koržyk z 29 kastryčnika pa 25 listapada 2020 hoda ŭ telehram-čatach raźmiaščaŭ kamientary i abraźlivyja vykazvańni ŭ dačynieńni da supracoŭnikaŭ milicyi z roznych haradoŭ, jakija na jaho dumku byli datyčnyja da razhonu masavych akcyj pratestu. Siarod paciarpiełych — radavyja milicyjanty, učastkovyja inśpiektary, kamandzir padraździaleńnia AMAPa, namieśnik načalnika AUS.
Usie jany vystavili patrabavańni ab spahnańni ŭ ich karyść hrašovaj kampiensacyi maralnaj škody.
Abvinavačany pryznaŭ svaju vinu i materyjalnyja pretenzii.
Sud pastanaviŭ pryznačyć Ramanu Koržyku pakarańnie ŭ vyhladzie abmiežavańnia voli biez nakiravańnia va ŭstanovu adkrytaha typu terminam na adzin hod, a taksama spahnać ź jaho 6 000 rubloŭ materyjalnaj kampiensacyi paciarpiełym — pa tysiačy rubloŭ kožnamu.