U Homieli adbyłosia pieršaje paśla 1917 hoda ŭniasieńnie skrutka Tory ŭ sinahohu
Pieršaje za 90 hadoŭ uniasieńnie skrutka Tory ŭ sinahohu adbyłosia 18 kastryčnika ŭ Homieli.
Na śviata Achnasat siejfier Tora (uniasieńnie skrutka Tory) u abłasny centr pryjechali biełaruskija jaŭrei, rabiny ź Izraila i Rasii, pradstaŭniki pasolstva Izraila, upaŭnavažany pa spravach relihij i nacyjanalnaściej Leanid Hulaka.
Skrutak byŭ stvorany pryblizna 200 hadoŭ tamu ŭ adnym ź biełaruskich abo ŭkrainskich miastečak.
Niadaŭna homielskaja iudziejskaja abščyna «Biejt Jaakaŭ» nabyła hety skrutak. 18 kastryčnika rukapis z Maskvy ŭ Homiel dastaviŭ dyrektar adzinaha ŭ SND instytuta sojfieraŭ (pierapisčykaŭ Tory). Skrutak Tory sustreli za kvartał ad sinahohi i pieradali hanarovym haściam. Toru nieśli pad chupaj (viasielnym bałdachinam), tamu što dla iudziejskaj abščyny ŭniasieńnie skrutka Tory ŭ niejkim sensie raŭnaznačna viasiellu. Praz peŭny čas «nasilščyki» Tory mianialisia — heta simvalizuje pierajemnaść i niaźmiennaść vučeńnia, vykładzienaha ŭ hałoŭnym iudziejskim rukapisu. Rytuał niasieńnia Tory supravadžaŭsia muzykaj i tancami, uračystaść i pryhažość abradu nadavali końniki, kareta, na jakoj vieźli skrutak, kałona junakoŭ z fakiełami.
Tora pišacca na śpiecyjalna vyrablenym pierhamiencie i vyklučna śpiecyjalistam — sojfier stamam. Praces pierapisvańnia moža ciahnucca hadami, hetaja praca kaštuje niekalki dziesiatkaŭ tysiač dołaraŭ.
Staršynia abščyny «Biejt Jaakaŭ» Josief Žołudzieŭ padkreśliŭ, što ŭniasieńnie skrutka Tory — važnaja padzieja ŭ žyćci jaŭrejaŭ horada i ŭsich jaŭrejaŭ śvietu. «Tora — heta asnova žyćcia, heta ŭsio: siamja, dzieci, ład žyćcia, myśleńnia, — skazaŭ Žołudzieŭ. — Jak čałaviek nie moža znachodzicca biez vady, hetak jaŭrei nie mohuć znachodzicca biez Tory».
Asobnaj sinahohi ŭ Homieli niama. Relihijnaja abščyna aranduje pamiaškańnie ŭ budynku, jaki naležyć śvieckaj jaŭrejskaj abščynie. U hetym budynku znachodziłasia adna z 46 homielskich sinahoh, što dziejničali da Kastryčnickaj revalucyi i Druhoj suśvietnaj vajny. «Byli pieramovy z uładami horada, nam paabiacali, što ŭ centry horada vydzielać abo ziamlu pad budaŭnictva, abo budynak, kab jaŭrejskaja abščyna mahła isnavać. Homiel — adziny abłasny centr u Biełarusi, dzie niama sinahohi. Chacia ŭ 1920—1930‑ch hadach 65% žycharoŭ horada składali jaŭrei», — zaznačyŭ Žołudzieŭ.
Žadańnie pajści nasustrač jaŭrejskaj abščynie i vydzielić abo ŭčastak ziamli, abo budynak paćvierdziŭ BiełaPAN upaŭnavažany pa spravach relihij i nacyjanalnaściej Leanid Hulaka. «Na hety momant jašče niama kankretnaha miesca abo budynka, ale hetaje pytańnie vyrašajecca stanoŭča», — padkreśliŭ upaŭnavažany.