Brytanskaja raźviedka: Rasija vykarystała źniščalnik piataha pakaleńnia Su-57 suprać Ukrainy, ale aściarožna
Pavietrana-kaśmičnyja siły Rasii pačynajučy z červienia 2022 hoda, vierahodna, vykarystoŭvali šmatfunkcyjanalny źniščalnik piataha pakaleńnia Su-57 (pa kadyfikacyi NATA — Felon) dla vykanańnia zadač suprać Ukrainy, havorycca ŭ štodzionnaj zvodcy vajskovaj raźviedki Minabarony Brytanii.
Fota: Minabarony Rasii
Heta samy sučasny ŭ Rasii zvyšhukavy bajavy reaktyŭny samalot piataha pakaleńnia, jaki vykarystoŭvaje technałohii małaprykmietnaści i pieradavuju avijoniku, adznačajuć aŭtary spravazdačy.
Apieracyi z Su-57, vierahodna, abmiažoŭvalisia pralotam nad terytoryjaj Rasii i zapuskam rakiet vialikaj dalokaści kłasa «pavietra-ziamla» abo «pavietra-pavietra» pa terytoryi Ukrainy, ličać u brytanskaj raźviedcy.
Na apošnich najaŭnych u adkrytym dostupie malunkach vidać, jak piać Su-57 stajać na avijabazie Achtubinsk — hetyja samaloty, chutčej za ŭsio, udzielničali ŭ apieracyjach suprać Ukrainy.
Rasija kłapocicca pra toje, kab paźbiehnuć naniasieńnia škody reputacyi Su-57 i paharšeńnia jaho ekspartnych pierśpiektyŭ, jakija mohuć paŭstać u vypadku straty najnoŭšaha samalota nad Ukrainaj, adznačajuć aŭtary zvodki. Jany ličać, što Rasija pa-raniejšamu nie schilnaja ryzykavać, užyvajučy svaje VPS nad ukrainskaj terytoryjaj.