Jašče dźvie ŭkrainskija kampanii zakryli pradstaŭnictvy ŭ Biełarusi
U Minharvykankamie ŭ studzieni pryniali zajavy ab zakryćci biełaruskich pradstaŭnictvaŭ ad kiraŭnictva Kijeŭskaha vitaminnaha i Pałohaŭskaha masłaekstrakcyjnaha zavodaŭ. Z pačatku vajennych dziejańniaŭ va Ukrainie ab spynieńni dziejnaści na terytoryi Biełarusi zajavili zvyš za dziasiatak biznesaŭ z susiedniaj krainy, paviedamlaje Office Life.
Ofis Kijeŭskaha vitaminnaha zavoda adkryŭsia ŭ Biełarusi ŭ 2011 hodzie. Na toj momant jon byŭ pieršym zamiežnym pradstaŭnictvam farmvytvorcy, bo da hetaha svaju pradukcyju (vitaminy, lekavyja preparaty, charčovyja dadatki i vietpreparaty) jon pradavaŭ tolki praz dystrybjutaraŭ.
Pradukcyja Pałohaŭskaha masłaekstrakcyjnaha zavoda viadomaja biełaruskim spažyŭcam pa handlovaj marcy «Słavija». U 2020-2021 hadach zavod uvachodziŭ u top-14 ukrainskich vytvorcaŭ słaniečnikavaha aleju. U sakaviku 2022 hoda horad Pałohi razam ź niekatorymi inšymi nasielenymi punktami Zaparožskaj vobłaści byŭ zachopleny rasijskimi vojskami, a zavod padčas bajavych dziejańniaŭ byŭ častkova razburany.