Ukraina ŭviała sankcyi suprać Siarhieja Rumasa
Prezident Ukrainy Uładzimir Zialenski zaćvierdziŭ 19 lutaha novyja sankcyi suprać 332 rasijan, adnaho biełarusa i Maskoŭskaj biržy. Ź biełarusaŭ pad sankcyi trapiŭ były premjer-ministr Siarhiej Rumas.
Siarhiej Rumas. Fota: BiełTA
Zhodna z apublikavanym na sajcie prezidenta Ukrainy dakumientam, u dačynieńni da Siarhieja Rumasa ŭvodziacca, siarod inšaha, nastupnyja sankcyi:
— błakavańnie aktyvaŭ — časovaje pazbaŭleńnie prava karystacca i rasparadžacca aktyvami, jakija naležać fizičnaj abo jurydyčnaj asobie, a taksama aktyvami, u dačynieńni da jakich takaja asoba moža prama ci ŭskosna ździajśniać dziejańni, tojesnyja rasparadžeńniu imi;
— poŭnaja zabarona na ździajśnieńnie handlovych apieracyj;
— abmiežavańnie, častkovaje abo poŭnaje spynieńnie tranzitu resursaŭ, palotaŭ i prajezdu pa terytoryi Ukrainy (poŭnaje spynieńnie);
— zabarona na vyvad kapitałaŭ za miežy Ukrainy;
— prypynieńnie vykanańnia ekanamičnych i finansavych abaviazacielstvaŭ;
— zabarona na pieradaču technałohij i pravoŭ na abjekty prava intelektualnaj ułasnaści;
— zabarona na nabyćcio va ŭłasnaść ziamielnych učastkaŭ.