Byŭ pažar u viadomaj minskaj łaźni, ludziej evakuavali
Siońnia dniom MNS atrymała paviedamleńnie ab zaharańni ŭ parylnym adździaleńni kompleksu «Łaźnia» pa vulicy Marjeŭskaj u Minsku. U vyniku daviałosia evakuavać 19 čałaviek.
Jak vyśvietliłasia, «u parylnym pamiaškańni na pieršym paviersie trochpaviarchovaha budynka łaźnieva-azdaraŭlenčaha kompleksu «Łaźnia» adbyłosia zaharańnie draŭlanaj ašaloŭki na płoščy 15 kv. m».
Z budynka kompleksu daviałosia evakuavać 19 čałaviek, paciarpiełych niama. Pažar nieŭzabavie byŭ likvidavany.
U vyniku zdareńnia paškodžanyja draŭlanyja elemienty paryłki, zakuranyja ścieny i stol u myjni. Pryčyna pažaru vyśviatlajecca. Pakul što dumajuć, što prablema ŭ parušeńni pravił ekspłuatacyi piečaŭ i inšych nahravalnych prystasavańniaŭ.