Karol stamiŭsia. «Rałan Haros» upieršyniu za 18 hadoŭ projdzie biez Rafaela Nadala
U hetym hodzie Adkryty čempijanat Francyi pa tenisie («Rałan Haros») upieršyniu z 2005 hoda projdzie biez Rafaela Nadala. U čaćvier ispaniec zajaviŭ, što vymušany źniacca z turniru z-za traŭmy. Jon taksama skazaŭ, što płanuje zaviaršyć tenisnuju karjeru paśla siezona 2024 hoda.
Rafael Nadal. Fota: Asanka Brendon Ratnayake / AP
«Nie ja prymaŭ rašeńnie, tak vyrašyła majo cieła, — skazaŭ Nadal. — Nastupny hod, vierahodna, budzie maim apošnim hodam, heta maja ideja. Kali ja zaraz budu praciahvać hulać, ja nie zmahu hetaha damahčysia».
«Rałan Haros» — adzin z čatyroch turniraŭ sieryi «Vialikaha šlema», i Rafael Nadal źjaŭlajecca absalutnym jaho karalom, piša Bi-bi-si.
Jon vyjhravaŭ turnir 14 razoŭ, uklučajučy minuły hod. Usiaho na rachunku ispanca 22 tytuły «Vialikaha šlema»: jašče pa dva razy jon vyjhravaŭ Australian Open i Uimbłdan, i čatyry razy — US Open.
«Situacyja z traŭmaj, jakuju ja atrymaŭ u Aŭstralii, raźvivałasia nie tak, jak mnie chaciełasia b. Z tych časoŭ mnie daviałosia šmat ad čaho admovicca, i ciapier «Rałan Haros» taksama niemahčymy. Vy možacie ŭjavić, jak heta ciažka dla mianie, uličvajučy, što dla mianie značyć hety turnir», — skazaŭ Nadal žurnalistam.
Pavodle jaho, jon nie maje namieru viartacca na kort u najbližejšyja niekalki miesiacaŭ. Ź vialikaj dolaj imaviernaści siezon-2023 možna ličyć dla Nadala daterminova zavieršanym.
«Rałan Haros» projdzie ŭ Paryžy 28 maja — 11 červienia. U kalendary hetaha hoda zastajecca jašče dva turniry «Vialikaha šlema» — Uimbłdan u lipieni i Adkryty čempijanat ZŠA ŭ vieraśni.
Čytajcie taksama:
Arynie Sabalenka nie dajuć brytanskuju vizu dla ŭdziełu va Uimbłdanie
FIFA pradstaviła łahatyp čempijanatu śvietu pa futbole 2026 hoda. I jon vielmi dziŭny