Cichanoŭskaja vykazała spačuvańni siamji Dźmitryja Sarokina, jaki raptoŭna pamior u Lidskim RAUS
Siońnia stała viadoma pra śmierć 37-hadovaha lidskaha paeta Dźmitryja Sarokina. Lidarka demakratyčnych sił Śviatłana Cichanoŭskaja vykazała spačuvańni rodnym Dźmitryja i zaklikała raspavieści praŭdu pra jaho śmierć.
Dźmitryj Sarokin
«Siońnia źjaviłasia infarmacyja, što ŭ RAUS horada Lidy raptoŭna pamior Dźmitryj Sarokin. Nam jašče nieviadomyja pryčyny taho, čamu Dźmitryj znachodziŭsia ŭ RAUS, ale heta ŭžo nie pieršy raz, kali siłaviki zatrymlivajuć jaho.
Infarmacyi ab pryčynie śmierci 37-hadovaha Dźmitryja pakul niama. Trahiedyja adbyłasia jašče ŭ čaćvier, 1 červienia, a siłaviki pa-raniejšamu ŭsio chavajuć i sprabujuć «zamiać» čarhovaje samavolstva. Tamu ja prašu ŭsich, chto viedaje niejkuju infarmacyju pra śmierć Źmitra, paviedamić jaje naŭprost svajakam, u niezaležnyja ŚMI ci pravaabaroncam. My pavinny daviedacca praŭdu.
Ja chaču vykazać ščyryja spačuvańni rodnym, blizkim i siabram Dźmitryja. Prama zaraz mnie b vielmi chaciełasia abniać vas, trymajciesia», — napisała ŭ telehram-kanale Cichanoŭskaja.
Dźmitryj pracavaŭ jak dyzajnier, markietołah, mastak-kanstruktar, mierčandajzier u roznych kampanijach. Jon skončyŭ Lidski techničny kaledž pa śpiecyjalnaści «technik-miechanik», a potym vučyŭsia ŭ Instytucie pradprymalnictva i parłamientaryzmu na dakumientaznaŭcu.
Pachavańnie pryznačana na aŭtorak.