Dla Zacharava pryznačeńnie trenieram zbornaj stała «vielizarnaj niečakanaściu»
Dla hałoŭnaha treniera minskaha «Junactva» i zbornaj Ukrainy Michaiła Zacharava pryznačeńnie na pasadu hałoŭnaha treniera chakiejnaj zbornaj stała «vielizarnaj niečakanaściu». Ab hetym jon zajaviŭ na pres‑kanfierencyi ŭ Minsku 19 listapada.
«Z druhoha boku, ja rady hetamu pryznačeńniu», — skazaŭ Zacharaŭ. Pavodle słoŭ treniera, 90% chakieistaŭ, jakija vystupajuć u zbornaj, źjaŭlajucca vychavancami «Junactva», ź jakimi jon niepasredna pracavaŭ. «Da Alimpijady my budziem pracavać razam uvohule 14 dzion. Ja pierahavaryŭ z usimi chłopcami. Jany zadavolenyja vybaram, zroblenym našymi kiraŭnikami. Zadačy buduć stavicca maksimalnyja», — adznačyŭ Zacharaŭ.
Pad maksimalnymi zadačami jon razumieje «najpierš vychad u vaśmiorku macniejšych» na Alimpijadzie ŭ Vankuviery,
bo «hrupa ciažkaja». «Potym treba dumać, tam usio adna hulnia budzie vyrašać, i na hetuju hulniu treba vychodzić. Kaniešnie, treba hulać z usimi, ale na rečy treba hladzieć realna», — padkreśliŭ Zacharaŭ.
Na dumku treniera, alimpijski chakiejny turnir budzie samym mocnym za ŭsiu historyju.
Na prośbu prakamientavać pastaŭlenuju Fiederacyjaj chakieja zadaču vystupić u Vankuviery nie horš, čym na Alimpijadzie 2002 hoda ŭ Sołt‑Łejk‑Sici, kali kamanda zaniała čaćviortaje miesca, Zacharaŭ adznačyŭ: «Zajaŭlać možna što chočacie. Ale treba analizavać. Kolki hulcoŭ NCHŁ budzie ŭ nas i ŭ sapiernikaŭ? Kolki našych abaroncaŭ majuć hulniovuju praktyku? Dobra, što ŭ nas jość varatary».
Trenier padkreśliŭ, što členy zbornaj, jakija vystupajuć u minskim «Dynama», pavinny mieć bolš hulniovaj praktyki. «Dla čaho tady my hetuju kamandu rabili? Usim treba zrazumieć, što heta hrošy dziaržaŭnyja, a nie sponsarskija. Hetaja kamanda stvarałasia pad Alimpijskija hulni», — skazaŭ jon.
Zacharaŭ sam napisaŭ zajavu z prośbaj razhledzieć jaho kandydaturu na pasadu hałoŭnaha treniera zbornaj i adnios u pryjomnuju Ministerstva sportu i turyzmu.
«Matyvacyjaj dla napisańnia zajavy było toje, što ŭsie da adnaho hulca mianie padtrymali, usie hatovyja sa mnoj pracavać. Usio‑taki situacyja była składanaja. Źmiena trenierskaha korpusu, miarkuju, była niapravilnaj, tamu hulcy pavinny viedać čałavieka, ź jakim jany buduć dalej pracavać», — skazaŭ Zacharaŭ. Pry hetym jon adznačyŭ, što, uznačaliŭšy zbornuju, pajšoŭ na ryzyku. U 2005 hodzie pad jaho kiraŭnictvam kamanda nie zmahła trapić na alimpijski turnir u Turynie. Pavodle słoŭ Zacharava, pryčynaj hetamu stali pierš za ŭsio jaho pamyłki i niedachop vopytu.
Zacharaŭ uchiliŭsia ad pramoha adkazu na pytańnie, ci pavinšavaŭ jaho z pryznačeńniem prezident NAK Alaksandr Łukašenka, adnak adznačyŭ, što jaho «pavinšavali ŭsie, akramia fiederacyi».
Novy hałoŭny trenier «na 90%» vyznačyŭsia z asistentami. Imi pavinny stać hałoŭny trenier minskaha «Dynama» Alaksandr Andryjeŭski i hałoŭny trenier nižniakamskaha «Naftachimika» Uładzimir Krykunoŭ. Akramia taho, Zacharaŭ raźličvaje damovicca z Dejvam Ljuisam, jaki byŭ asistentam u raniejšaha nastaŭnika zbornaj Hlena Chenłana.