Čaćviortaja noč biesparadkaŭ u Francyi z-za śmierci padletka: ułady pryciahnuli 45 tysiač palicejskich, sotni ludziej zatrymanyja
Udzielniki biesparadkaŭ padpalvajuć budynki i aŭtamabili, uryvajucca ŭ kramy pa ŭsioj krainie.
Pažarny tušyć aŭtobus u Nantery. Fota: Lewis Joly / AP
Francuzskija ŭłady zadziejničali 45 tysiač palicejskich i braniatechniku dla zabieśpiačeńnia paradku ŭ čaćviortuju noč biesparadkaŭ praz zabojstva palicyjantam padletka, jak piša Bi-bi-si.
Udzielniki biesparadkaŭ padpalvajuć budynki i aŭtamabili, uryvajucca ŭ kramy pa ŭsioj krainie, u tym liku ŭ Marsieli, Lijonie, Tułuzie, Strasburhu, Lili i Paryžy, u adnym z pryharadaŭ jakoha — Nantery — i zahinuŭ 17-hadovy padletak.
Pavodle papiarednich źviestak, niepaŭnaletni Nael, ałžyrac pa pachodžańni, u aŭtorak ranicaj byŭ spynieny palicejskim patrulom za rulom aŭtamabila Mercedes za parušeńnie praviłaŭ i zastreleny.
Palicyjanty spačatku zajavili, što padletak sprabavaŭ źbić ich, ale na apublikavanym paźniej videa zdareńnie vyhladaje inakš.
Z tych časoŭ kožnuju noč francuzskija harady achoplivajuć biesparadki.
Kiraŭnik MUS Francyi Žerald Darmanien śćviardžaje, što abstanoŭka hetaj nočču našmat spakajniejšaja, čym napiaredadni.
Padčas načnoha vizitu ŭ Departamient Ivielin na zachad ad Paryža jon zajaviŭ, što maštab biesparadkaŭ staŭ značna mienšym, a ŭ niekatorych rajonach situacyja «nadzvyčaj spakojnaja».
Adnačasova pastupajuć paviedamleńni pra paŭsiudny chaos u haradach pa ŭsioj Francyi. MUS paviedamiła, što kolkaść zatrymanych pieravysiła 470. Napiaredadni byli aryštavanyja bolš za 900 čałaviek.
U Marsieli za noč byli zatrymanyja nie mienš za 80 čałaviek.
Na videarolikach, apublikavanych u sacyjalnych sietkach, bačny vybuch u Starym porcie horada. Haradskija ŭłady zajavili, što rasśledujuć pryčynu zdareńnia, ale miarkujuć, što achviar u vyniku vybuchu niama.
Taksama raspaŭsiudžvajucca kadry, na jakich furhon taranić uvachod u supiermarkiet Aldi, paśla čaho tudy zabiahajuć ludzi. Na inšych zapisach vidać, što supiermarkiet haryć.
Sa słoŭ palicyi, raniej udzielniki biesparadkaŭ razrabavali zbrojevuju kramu ŭ horadzie i skrali palaŭničyja strelby, ale nie ŭziali bojeprypasy.
Mer Marsiela Bienua Pajan zaklikaŭ urad nieadkładna nakiravać dadatkovyja siły biaśpieki ŭ horad.
Paźniej kiraŭnik MUS Darmanien napisaŭ u tvitary, što «ŭ hety momant [u Marsiel] prybyvaje padmacavańnie».
Palicejski, jaki zastreliŭ padletka, aryštavany, jamu vystaŭlenyja abvinavačvańni ŭ naŭmysnym zabojstvie. U čaćvier jon publična paprasiŭ prabačeńnia pierad siamjoj zahinułaha.
Jaho advakat Łaran-Frank Ljenar skazaŭ, što palicejski «spustošany» i što jaho padabaronny — nie taki čałaviek, jaki «ŭstaje pa ranicach, kab zabivać ludziej».
«Pieršymi słovami, jakija jon vymaviŭ, byli prabačeńni. I apošnimi słovami, jakija jon skazaŭ, byli prabačeńni pierad siamjoj», — zajaviŭ advakat abvinavačanaha.