Erdahan pahadziŭsia razbłakavać ustupleńnie Šviecyi ŭ NATA
Hienieralny sakratar NATA Jens Stołtenbierh zajaviŭ, što Turcyja pahadziłasia ŭchvalić ustupleńnie Šviecyi ŭ Paŭnočnaatłantyčny aljans «jak maha chutčej», piša «Jeŭrapiejskaja praŭda».
Redžep Taip Erdahan, Jens Stołtenbierh i Ulf Krystersan. Fota: Yves Herman, Pool Photo via AP
Pa słovach Stołtenbierha, paśla trochbakovaj sustrečy z udziełam premjera Šviecyi Ulfa Krystersana turecki prezident «pahadziŭsia nakiravać pratakoł ab ratyfikacyi ŭstupleńnia Šviecyi ŭ NATA ŭ parłamient jak maha chutčej i supracoŭničać z parłamientam, kab harantavać jaho ŭchvaleńnie».
Hienieralny sakratar NATA taksama kanstatavaŭ, što Šviecyja vykanała ŭsie ŭmovy miemaranduma, zaklučanaha na letašnim samicie Aljansu ŭ Madrydzie, kab zadavolić zaniepakojenaść Turcyi ŭ pytańni biaśpieki.
«Šviecyja i Turcyja pahadzilisia siońnia zaklučyć dvuchbakovuju damovu biaśpieki. NATA taksama značna ŭzmocnić svaju pracu ŭ hetaj śfiery, tamu ja ŭpieršyniu zasnuju ŭ štab-kvatery NATA pasadu śpieckaardynatara ŭ pytańniach kontrteraryzmu», — dadaŭ jon.
Šviecyja razam ź Finlandyjaj letaś padali zajaŭku na ŭstupleńnie ŭ NATA. Ale kali Chielsinki ŭžo ŭ krasaviku 2023-ha stali 31-m členam Aljansu, to Turcyja tarmaziła ŭstupleńnie Šviecyi, spasyłajučysia na jaje nibyta niedastatkovuju baraćbu z teraryzmam.