«Ukraina zasłuhoŭvaje pieramohi». Łaŭreaty Nobieleŭskaj premii miru źviernucca z važnym pasłańniem da ŭrada ZŠA
Z 25 da 28 lipienia delehacyja łaŭreataŭ Nobieleŭskaj premii miru 2022 hoda z Ukrainy, Biełarusi i Rasii praviadzie sustrečy z vysokapastaŭlenymi pradstaŭnikami ŭrada ZŠA, padčas jakich vykaža niepachisnuju padtrymku Ukrainie.
Razburany ad rakietnaha ŭdaru ŭ studzieni 2023 hoda dom u Dniapry. Fota z sacsietak
Padčas čatyrochdzionnaha vizitu delehacyja ŭ składzie Alaksandry Maćviajčuk z «Centra hramadzianskich svabod» Ukrainy, Alaksandra Čarkasava z rasijskaha pravaabarončaha centra «Miemaryjał» i Kanstancina Staradubca z PC «Viasna», jaki pradstaŭlaje źniavolenaha łaŭreata Alesia Bialackaha, sustreniecca z pradstaŭnikami Dziaržaŭnaha departamienta, kamisii pa biaśpiecy i supracoŭnictvie ŭ Jeŭropie, Kamiteta pa mižnarodnych adnosinach ZŠA i Biełaha doma, a taksama z roznymi ekśpiertami ŭ halinie prava z upłyvovych analityčnych centraŭ, piša «Viasna».
Łaŭreaty Nobieleŭskaj premii miru 2022 hoda vystupili z zajavami, u jakich vykazalisia za aktyŭniejšy ŭdzieł ZŠA ŭ padtrymcy pieramohi Ukrainy i rekamiendacyi pa adnaŭleńni mižnarodnaj sistemy miru i biaśpieki. Alaksandra Maćviajčuk z «Centra hramadzianskich svabod» padkreślivaje, što Rasija ŭžo daŭno vykarystoŭvaje vajennyja dziejańni jak srodak dasiahnieńnia svaich hieapalityčnych metaŭ, užyvajučy vajennyja złačynstvy ŭ jakaści stratehii zabieśpiačeńnia pieramohi.
Takaja karcina prasočvajecca ŭ mnohich rehijonach, uklučajučy Čačniu, Hruziju, Małdovu, Mali i Siryju. Charakterna, što na praciahu ŭsich hetych kanfliktaŭ Rasii ŭdavałasia sychodzić ad adkaznaści za svaje dziejańni. Na dumku Maćviajčuk, dla taho kab pryciahnuć da adkaznaści Uładzimira Pucina, vyšejšaje kiraŭnictva Rasii i vajskoŭcaŭ, nieabchodna razarvać koła biespakaranaści.
Kanstancin Staradubiec adznačaje, što pieramoha Ukrainy nie tolki pryniasie svabodu Biełarusi, ale i budzie simvalizavać tryumf hramadzianskaj supolnaści ŭ krainie, jakaja znachodzicca pad rasijskaj akupacyjaj.
«Zachavać mir i niezaležnaść Biełarusi niemahčyma, nie spyniŭšy ahresiŭnaha rasijskaha impieryjalizmu. A heta vymahaje pieramohi Ukrainy», — skazaŭ Kanstancin Staradubiec.