U Danii znoŭ spalili Karan. Musulmanski śviet pratestuje
Irak i niekatoryja inšyja krainy z musulmanskaj bolšaściu rezka asudzili spaleńnie Karana ŭ paniadziełak la budynka pasolstva Iraka ŭ Kapienhahienie.
Irakcy padymajuć asobniki Karana, śviaščennaj knihi musulman, padčas akcyi pratestu ŭ Bahdadzie, Irak, u subotu, 22 lipienia 2023 hoda. Fota: AP Photo/Hadi Mizban
Dvoje siabroŭ hrupy «Dackija patryjoty» rastaptali i padpalili śviatuju knihu ŭ łatku z folhi, pakłaŭšy jaje na ziamlu pobač ź irakskim ściaham. Na minułym tydni siabry hrupoŭki tranślavali anałahičny akt u fejsbuku, piša Bi-bi-si.
Paśla hetaha kala tysiačy demanstrantaŭ u Bahdadzie sprabavali praniknuć u pasolstva Danii.
Na minułym tydni irakski biežaniec-chryścijanin atrymaŭ dazvoł u druhi raz spalić Karan u Stakholmie. Praŭda, jon nie spaliŭ jaho, ale rastaptaŭ nahami. Šviedskaja palicyja sprabavała zabaranić hetaje dziejstva, adnak sud skasavaŭ zabaronu, spasyłajučysia na zakonnaje prava na svabodu schodaŭ.
Švecyi daviałosia evakujavać supracoŭnikaŭ svajho pasolstva z Bahdada paśla taho, jak u budynak pranikli demanstranty. Irak taksama vysłaŭ šviedskaha pasła, a ŭ minuły čaćvier pratestoŭcy ŭ Iraku padpalili šviedskuju ambasadu ŭ Bahdadzie.
Šviedskija ŭłady asudzili spaleńnie śviaščennaj knihi jak isłamafobskaje.
Ministerstva zamiežnych spraŭ Iraka zajaviła, što padobnyja dziejańni dazvalajuć «virusu ekstremizmu i nianaviści» być «realnaj pahrozaj mirnamu suisnavańniu hramadstvaŭ».
Čarhovaje apahańvańnie knihi ŭ stalicy Danii vyklikała šmattysiačnuju akcyju pratestu ŭ jemienskaj stalicy Sanie, udzielniki jakoj vykazali hnieŭ na adras Danii i Šviecyi za toje, što jany dapuskajuć padobnyja dziejańni.
Turcyja nazvała toje, što adbyłosia, «ahidnym napadam» na Karan, a Ministerstva zamiežnych spraŭ Ałžyra vyklikała ambasadara Danii i pavieranaha ŭ spravach Šviecyi, kab asudzić hetyja dziejańni.
Iran u subotu taksama vykazaŭ pratest u suviazi z padziejami, jakija adbylisia raniej. ŚMI Katara paviedamili, što na najbujniejšym u krainie rynku Suk Al-Baładzi na znak pratestu byli kanfiskavanyja šviedskija tavary.
U subotu ŭ Bahdadzie siły biaśpieki ŭžyli ślezaciečny haz, kab nie dapuścić vialikich natoŭpaŭ ludziej da pasolstva Danii. Pierachody va ŭmacavanuju «zialonuju zonu» horada, dzie raźmieščany mnohija zamiežnyja ambasady, byli zakrytyja.