Padčas vybuchu drona na aeradromie ŭ Kursku paciarpieła kiraŭnictva avijapałka — miedyja
Na aeradromie Chalina ŭ rasijskim Kursku vybuchnuŭ bieśpiłotnik — jość zabityja i paranienyja siarod kiraŭnictva avijacyjnaha pałka, paviedamlaje «RBK-Ukraina» sa spasyłkaj na krynicy ŭ HUR.
Siońnia pad ataku drona trapiŭ aeradrom Chalina, raźmieščany za 7 kiłamietraŭ ad centra Kurska. Na aeradromie bazujecca 14-y hvardziejski źniščalny avijacyjny połk imia Ždanava, piša vydańnie.
Jak raspaviali «RBK-Ukraina» krynicy ŭ vajskovaj vyviedcy, mahutny vybuch adbyŭsia na ŭźlotna-pasadačnaj pałasie.
Rasijanie, pavodle krynic vydańnia, siłami REB pierachapili BPŁA pobač z aeradromam, i dalej dron nibyta byŭ «biaśpiečna pryziemleny» na ŭźlotna-pasadačnaj pałasie. Paśla hetaha ahledzieć jaho nibyta pryjechała kiraŭnictva avijapałka i aficery FSB.
«Kali delehacyja pasprabavała ahledzieć BPŁA, adbyłasia detanacyja bojeprypasaŭ», — raspavioŭ surazmoŭca.
Pa danych krynic, pry vybuchu zabityja abo atrymali ranieńni:
kamandzir 14-ha avijapałka;
adzin ź jaho namieśnikaŭ;
hrupa aficeraŭ-avijataraŭ;
pradstaŭnik vajskovaj kontrvyviedki FSB;
rabotniki aeradroma.
Hetaj ranicaj u rasijskim Kursku adbyłasia čarhovaja ataka bieśpiłotnikaŭ. Jak raspaviali «RBK-Ukraina» krynicy, dron trapiŭ u miascovy budynak MUS.
Krynica padkreśliła, što ataki na Kursk praciahvajucca.
Učora ŭkrainski bieśpiłotnik atakavaŭ budynak FSB u Kursku ŭ Dzień horada, a taksama naftapierapracoŭčy zavod kala aeradroma.