Stała viadoma, kudy pastavili dyrektaram pamiłavanaha Kryštapoviča. Papiaredniuju načalnicu niadaŭna pasadzili
Michaił Kryštapovič, były dyrektar Haradziejskaha cukrovaha kambinata, jaki puściŭ pad adchon karjeru Šunieviča i sam atrymaŭ prysud u 13 hod, niadaŭna vyjšaŭ pa pamiłavańni i atrymaŭ u kiravańnie haspadarku. Heta vialiki śvinakompleks u Homielskaj vobłaści, dzie papiaredniuju dyrektarku dva miesiacy tamu pasadzili na 4 hady.
Michaił Kryštapovič. Fota: Tut.by
Niadaŭna «Naša Niva» paviedamlała pra toje, što vyjšaŭ na volu były dyrektar Haradziejskaha cukrovaha kambinata, jaki ŭ 2021-m byŭ asudžany na 13 hadoŭ kałonii za chabarnictva ŭ asabliva bujnym pamiery.
Čytajcie taksama: Asudžany na 13 hadoŭ Michaił Kryštapovič paprasiŭ pamiłavańnia ŭ Łukašenki i vyjšaŭ na volu, atrymaŭšy ŭ votčynu kałhas
Niekali, kab jaho zatrymać, razvaročvali samalot.
Jak stała viadoma ciapier, Kryštapovič atrymaŭ u kiravańnie nie prosta niejki zakinuty kałhas, a arhakambinat «Chołmieč» u Rečyckim rajonie.
Heta vialikaja haspadarka, čyj asnoŭny profil — śvinahadoŭla.
Papiaredniuju kiraŭnicu «Chołmiečy» litaralna hetym letam asudzili: «Homielskaja praŭda» paviedamlała, što 58-hadovaja dyrektarka «Chołmiečy» nibyta zahadvała svaim padnačalenym skažać źviestki ab padziažy skaciny i źmianšeńni prypłodu ŭ śvińniaŭ.
Za pieravyšeńnie paŭnamoctvaŭ žančynie prysudzili štraf 11 tysiač rubloŭ i 4 hady kałonii ahulnaha režymu.
Asudžanaja eks-kiraŭnica «Chołmiečy». Fota: gp.by
Na pačatku 2020-ha samalot «Biełavija», jaki lacieŭ u Miunchien, raźviarnuli na zahad Łukašenki i pasadzili ŭ Hrodnie. U samalocie byŭ u tym liku Michaił Kryštapovič, na toj čas — dyrektar Haradziejskaha cukrovaha kambinata. Pa pryziamleńni jaho aryštavaŭ KDB.
Pa «spravie cukrovych zavodaŭ» prachodziła niekalki dyrektaraŭ zavodaŭ (žabinkaŭskaha, słuckaha, skidzielskaha i haradziejskaha), a taksama niekalki kamiersantaŭ i namieśnik Karpiankova ŭ HUBAZiKu — načalnik 2-ha ŭpraŭleńnia Uładzimir Cichinia.
Były ministr MUS Ihar Šunievič taksama fihuravaŭ u hetaj spravie — na jaho davali pakazańni ŭdzielniki historyi. Ale sudzić jaho nie stali.
KDB zajaviŭ, što praź dziejańnie hetaj hrupy biudžet niedaličyŭsia 70 miljonaŭ dalaraŭ. Sama schiema zaklučałasia ŭ adhruzcy pasiarednikam cukru pa stratnych cenach z nastupnaj realizacyjaj praź nieabaviazkovuju prakładku pa zavyšanaj canie. Čynoŭniki z hetaha mieli dolu, jak i Cichinia, jaki kansultavaŭ zmoŭščykaŭ na pradmiet biaśpieki i intaresu da ich sumiežnych orhanaŭ.
U 2021-m mnohija (aproč Cichini, jaki vyjšaŭ pierad vybarami apracoŭvać kryminalny elemient dla baraćby z apazicyjaj), atrymali terminy.
Kryštapovič atrymaŭ 13 hadoŭ kałonii. Adbyvaŭ termin u Babrujsku.
Šmatrazovyja chadajnictvy Kryštapoviča na imia Łukašenki ab pamiłavańni dali plon, i Kryštapovič byŭ pamiłavany.