U Łapłandyi šukajuć sotni zamiežnych siezonnych rabotnikaŭ — jość i vakansii hnomaŭ, Santa-Kłausaŭ i śniehavikoŭ
U hetym hodzie kolkaść vakansij udvaja bolšaja, čym letaś.
Rezidencyja Santa-Kłausa (Jołapuki) u Rovanijemi. Fota: Alberto Conti / Getty Images
Ahienctvy pa pracaŭładkavańni i inšyja pradprymalniki šukajuć sotni, kali nie tysiačy rabotnikaŭ na zimovy siezon, u asnoŭnym dla śfiery turyzmu Łapłandyi (tut — poŭnač Finlandyi), piša yle.fi.
Najbolšy deficyt nazirajecca ŭ śfiery turyzmu i charčavańnia. Jość praca i dla kazačnych piersanažaŭ: Santa-Kłausa i hnomaŭ, a ŭ Rovanijemi na pracu najmajuć śniehavych bałvanoŭ.
Kirsi Karchu, rehijanalny mieniedžar kampanii Barona ŭ paŭnočnaj Finlandyi, adznačaje, što ŭ turystyčnym siektary Łapłandyi kolkaść vakansij dla pracy ŭ zimovy pieryjad amal u dva razy bolšaja, čym letaś.
— Heta, biezumoŭna, źviazana z pavieličeńniem zakazaŭ z boku turkampanij, a taksama z tym, što ŭsio bolš turystyčnych kampanij Łapłandyi hatovyja prymać na pracu zamiežnych supracoŭnikaŭ.
Pavodle jaje słoŭ, patreba ŭ rabočaj sile vialikaja, bo turystyčny siektar pakutuje ad niedachopu kvalifikavanych rabotnikaŭ.
— Biespracoŭnyja finskija suiskalniki časta albo znachodziacca nie tam, dzie jość praca, albo nie zacikaŭlenyja ŭ siezonnaj pracy, albo nie vałodajuć navykami, nieabchodnymi dla toj pracy, jakuju šukaje turystyčnaja halina, — kaža Karchu.
Jak adznačaje Karchu, asabliva vostra deficyt kadraŭ adčuvajecca ŭ turystyčnym siektary. Nie chapaje aficyjantaŭ, kucharaŭ, administrataraŭ, hidaŭ, rabotnikaŭ fast-fudu — usie jany znojduć dobruju pracu ŭ Łapłandyi.