U Słucku pakarali 28 słužbovych asob za zabojstva baćkami syna
Dziejny miechanizm abarony dziaciej, jak pakazała trahiedyja ŭ Słucku, nie spracavaŭ, a ciapierašniaj narmatyŭnaj bazy niedastatkova, kali ŭsio jašče adbyvajucca trahiedyi z udziełam dziaciej, zajaviŭ namieśnik premjer-ministra Ihar Pietryšenka pierad pačatkam pasiadžeńnia nacyjanalnaj kamisii pa pravach dziciaci, jakaja prajšła 31 kastryčnika ŭ Saviecie Ministraŭ, piša sb.by.
Baćki zabitaha chłopčyka ŭ sudzie. Fota: «Minskaja praŭda»
— Vypadak, jaki ŭskałychnuŭ usiu krainu, našu hramadskaść, jaki adbyŭsia ŭ Słuckim rajonie (dzie ad ruk ułasnych baćkoŭ zahinuła dzicia. — Red.), kaža ab tym, što ŭ poŭnaj miery miechanizm efiektyŭna nie spracoŭvaje.
Na kamisii zasłuchali słužbovych asob sistemy achovy zdaroŭja, adukacyi, Ministerstva ŭnutranych spraŭ na pradmiet taho, dzie ałharytm uzajemadziejańnia daŭ zboj, što ŭ kančatkovym vyniku i pryviało da trahiedyi.
28 słužbovych asob sa Słucka, jakija dapuścili i svoječasova nie pieraduchilili katavańnia małoha, pryciahnuty da adkaznaści, paviedamiŭ Pietryšenka, ale jak mienavita pakarali ich, nie paviedamiŭ.
Trochhadovy Siamion pamior ad čerapna-mazhavoj traŭmy 14 studzienia. Chłopčyka zakatavali jaho ŭłasnyja baćki — jany nie davali jamu jeści, bili, źviazvali.
19 kastryčnika Mienski abłasny sud pryznaŭ ich vinavatymi ŭ katavańni i zabojstvie z asablivaj žorstkaściu hrupaj asob zaviedama małaletniaha.
Baćku chłopčyka, 48-hadovaha Alaksandra Taratutu, prysudzili da vyklučnaj miery pakarańnia — śmiarotnaha pakarańnia. Maci chłopčyka, 37-hadovuju Anastasiju Taratutu, — da 25 hadoŭ pazbaŭleńnia voli. Dla žančyny ŭ Biełarusi heta maksimalnaje pakarańnie.
U pary, akramia zahinułaha chłopčyka, było jašče troje dziaciej, ź jakich dvoje — ad pieršych šlubaŭ abvinavačanaj. U adnosinach da ich paru pazbavili baćkoŭskich pravoŭ.
Siamja nieadnojčy traplała ŭ pole zroku sacyjalnych orhanaŭ, pra stan chłopčyka viedali miedyki, ale adpaviednych mieraŭ jany nie pryniali.
Čytajcie taksama: