Zekanomiać na ŭsich, akramia milicyi
Biudžet-2010: skarociacca vydatki navat na orhany dziaržaŭnaj biaśpieki i praŭładnyja ŚMI. U liderach pa ŭrazańni -- adukacyja i achova zdaroŭja.
Vydatki ź biudžetaŭ pa hadach.
Vydatki kansalidavanaha biudžetu Biełarusi na 2010 hod składuć 55,7 tryljona rubloŭ (kala 19,5 miljardaŭ dalaraŭ).
Asablivaściu 2010 hoda stanie toje, što kansalidavany i respublikanski biudžet — heta ŭžo nie adno i toje ž. Ciapier fond sacyjalnaj abarony nasielnictva vydzieleny ŭ asobnuju strukturu. Jana budzie isnavać asobna ad respublikanskaha biudžetu, ale ŭličvacca ŭ kansalidavanym. Na sacyjalnuju abaronu — pieravažna piensii — vydatkoŭvajecca tracina ad ŭsich hrošaj, kala 18 tryljonaŭ rubloŭ.
Dziaržbiaśpieka niedaatrymaje
Pa tym, jak raźmiarkoŭvajucca astatnija finansy, možna vyznačyć pryjarytety biełaruskaj ułady.
Milicyja — naša ŭsio. Tolki orhany ŭnutranych spravaŭ atrymajuć naleta bolej, čym było sioleta. Dziaržava «padkinuła» milicyjantam jašče $30 młn. Ciapier u tych budzie 1,1 tryljona rubloŭ ($385 miljonaŭ). Dla nahladnaści nastupnyja ličby buduć padavacca mienavita ŭ pieravodzie na valutu — u tryljonach rubloŭ ciažka razabracca.
Na KDB dziaržava budzie aščadžać — zamiest $85 młn, jak było ŭ 2009 h., im dastaniecca «ŭsiaho» $69 młn.
Uzbrojenym siłam taksama abrezali: $515 młn. U hetym hodzie było $574.
Adukacyi — mienš, čym vojsku
Ministr finansaŭ Andrej Charkaviec paviedamiŭ, što vypłaty na miedycynu i adukacyju pavialičacca na 6—7%. Tym nie mienš, supastaŭleńnie ličbaŭ pierakonvaje ŭ advarotnym. Kankretny prykład u rublach — u zakonie «Ab respublikanskim biudžecie na 2009 hod» na adukacyju vydzielena 1,77 trłn rubloŭ. Na 2010 hod zapłanavana vydatkavać 1,4 trłn. Na 21% mienš! A kali pieraličyć sumu ŭ valucie, to vychodzić jašče macniej. Z $622 młn da $491 młn adpaviedna.
Padobnaja situacyja i ź miedycynaj. Było $540 miljonaŭ — stała $442.
U napružanym spabornictvie miž sportam i kulturaj inicyjatyvu pierachapiła siła. Letaś kultura była napieradzie — 85 suprać 80 (u miljonach dalaraŭ). Ciapier fizkultura i sport adyhralisia. Jany atrymajuć $65 młn, na duchoŭnaje ž vydatkoŭvajecca $63 młn.
Apošniuju kašulu dypłamatam
Jašče adna achviara ekamičnaha kryzisu — praŭładnyja ŚMI. U ich adabrali $8 młn. Zdajecca, šmat, ale na padtrymku łukašenkaŭskich haziet i telekanałaŭ padatkapłatniki ŭsio adno addaduć až $59 miljonaŭ.
Ekanomija kiraŭnika dziaržavy na sabie nie takaja vialikaja. Ad sioletnich $12 młn, vydatkavanych na «dziaržaŭnyja orhany, jakija zabiaśpiečvajuć dziejnaść prezidenta», zastałosia 10 młn.
Jak i letaś, unioski ŭ sajuznuju dziaržavu praktyčna roŭnyja vydatkam na ŭtrymańnie dypłamatyčnych pradstaŭnictvaŭ Biełarusi va ŭsim śviecie. I tyja, i tyja ŭsio rastuć — $60 młn i $65 młn adpaviedna.
Varta adznačyć, što biudžet na 2009 hod dadatkova pierahladaŭsia u mai hetaha hoda ŭ bok panižeńnia. Chto viedaje, ci ŭdasca vykanać biudžet‑2010, kali zapłanavanaha ekanamičnaha rostu dasiahnuć nie ŭdasca.