«Palityka raniejšaja — poŭnaja denacyjanalizacyja». U Astraŭcy haradžanie vykazvajucca suprać «biessensoŭnych» nazvaŭ vulic
Rajonnyja ŭłady ŭ Astraŭcy vyrašyli dać nazvy prajektavanym vulicam i prajezdam u rajonach siadzibnaj i šmatkvaternaj zabudovy ŭ centry Astraŭca. Haradžan zaklikajuć vykazacca z hetaj nahody, ale tyja navat stvaryli pietycyju suprać prapanavanych nazvaŭ, piša Hrodna.life.
Astraviec. Fota: Hrodna.life
Rajvykankam prapanuje bolš padrabiazna aznajomicca z pytańniem da 14 śniežnia. Mierkavańni hramadzian nakont nazvaŭ vulic u piśmovaj formie źbirajuć na aficyjny adras ustanovy (Astraviec, vuł. Kastryčnickaja, 8) i na elektronnuju poštu arhit-ostrovec@mail.ru.
Hramadzianie aburylisia
Haradžan aburyła biessensoŭnaść prapanavanych nazvaŭ vulic Astraŭca, i jany vyrašyli źviarnucca da ŭładaŭ kalektyŭna.
«Prapanavanyja da prysvajeńnia nazvy nastolki abstraktnyja, što nie niasuć u sabie anijakaha sensu. U hety čas nieŭšanavanymi zastajucca imiony vydatnych biełarusaŭ, žycharoŭ Astravieččyny, čyja dziejnaść na karyść hramadstva musić być prykładam dla ŭsich», — pišuć stvaralniki pietycyi.
Jakija nazvy chočuć bačyć žychary?
Aŭtary pieraličyli asob, źviazanych z krajem, i jakich, na ich dumku, varta ŭšanavać u haradskoj tapanimicy:
- Albin Stapovič — paet, publicyst i muzyka;
- Janka Bylina — paet, dramaturh i śviatar ź vioski Łakciany;
- Marjan Bohuš-Šyška — mastak z Trokienikaŭ;
- Iosif Haškievič — vučony-movaznaŭca, daśledčyk Japonii i Kitaja, jaki pravioŭ apošnija hady svajho žyćcia ŭ Malach;
- Leŭ Dabžynski — mastak, pachavany ŭ vioscy Łoša ŭ 1938 hodzie;
- Kazimir Svajak — hramadska-palityčny dziejač, paet, dramaturh, publicyst, litaraturaznaviec, katalicki śviatar, jaki naradziŭsia ŭ vioscy Barani.
«Pakul hetyja asoby nie ŭšanavany, nie zrazumieła, jak havorka moža iści pra ŭšanavańnie sałaŭjoŭ i žuraŭloŭ — jaki prykład jany padajuć, jaki nacyjanalny honar jany abudžajuć u žycharoŭ horada? Nijaki», — padvodziać vysnovu ŭ pietycyi.
«Palityka raniejšaja — poŭnaja denacyjanalizacyja», — prakamientavaŭ situacyju kanał «Spadčyna».
Na momant publikacyi hetaha tekstu pietycyju padpisała 28 čałaviek. Podpisy źbirajuć da 23 listapada. Paśla jaje skirujuć u Astraviecki rajvykankam.
Vajna nazvaŭ u Astraŭcy
U Astraŭcy nie ŭpieršyniu sprabujuć ušanavać słavutych ziemlakoŭ. U červieni 2022 hoda ŭ Astraviecki rajvykankam pastupaŭ zvarot siabroŭ hramadskaha abjadnańnia «Biełaruski fond kultury» ab uviekaviečańni pamiaci litaraturaznaŭca i historyka Adama Maldzisa, jaki naradziŭsia ŭ Astravieckim rajonie. 24 červienia 2022 hoda vyjšła rašeńnie Astravieckaha rajvykankama № 461 «Ab pierajmienavańni dziaržaŭnaj ustanovy kultury «Astravieckaja rajonnaja biblijateka».
U lipieni 2022 praŭładnaja prarasijskaja aktyvistka Volha Bondarava z hetaj nahody aburyłasia i źviarnułasia ŭ Hrodzienski abłvykankam. Spačatku tam paviedamili, što admianiać rašeńnie ab pierajmienavańni nie płanujuć. Ale paźniej arhumienty Volhi pra «prapolskaha dziejača» i «machrovaha nacyjanalista» pryniali.