Eks-kiraŭnik rasijskaha Hienštaba zajaviŭ pra pravał va Ukrainie rasijskaj artyleryi, tankaŭ i avijacyi
Rekordnaja ŭ historyi Rasii dziaržprahrama ŭzbrajeńniaŭ, jakaja kaštavała biudžetu krainy 20 tryljonaŭ rubloŭ za 10 hadoŭ, akazałasia nie ŭ stanie likvidavać adstavańnie rasijskaj zbroi ad zachodniaj. Vajna va Ukrainie vyjaviła prablemy klučavych vidaŭ uzbrajeńniaŭ rasijskaj armii — artyleryi, rakietnych sistem, tankaŭ i avijacyi, zajaviŭ były načalnik Hienštaba RF Juryj Bałujeŭski, jakoha cytuje časopis «Armiejskij standart».
Juryj Bałujeŭski. Fota: Ahienctva «Moskva»
Pa słovach Bałujeŭskaha, rasijskija artyleryja i rakietnyja kompleksy «značna» sastupajuć zachodnim, z-za čaho ŭ najbližejšyja hady patrabujecca ich «pryjarytetnaja i kardynalnaja madernizacyja».
Pry hetym artyleryja «viarnułasia na pjedestał boha vajny», padkreślivaje Bałujeŭski: «Ledź nie vyznačalnym faktaram boju i apieracyi stanovicca kolkaść vypuščanych snaradaŭ».
Prablemy, praciahvaje Bałujeŭski, taksama vyklikała vykarystańnie na vajnie tankaŭ: jany akazalisia «lohka vyjaŭlanaj i lohka paražalnaj cellu».
Akramia taho, była faktyčna abiascenienaja pieravaha Rasii ŭ pavietry, pakolki zadača padaŭleńnia SPA praciŭnika «akazałasia nievyrašalnaj». U vyniku stali niemahčymymi zamacavanyja formy prymianieńnia bajavoj avijacyi — pavietranaja nastupalnaja apieracyja ci masiravanyja avijacyjnyja ŭdary, adznačaje hienierał.
U cełym ža, raźviazanaja Rasijaj vajna va Ukrainie, na dumku Bałujeŭskaha, pakazała nieabhruntavanaść prahnozaŭ raźvićcia vajskovaj spravy i zapatrabavała pieraacenki roli i miesca roznych vidaŭ zbroi.
Jon ličyć, što mnohija padručniki taktyki, pa jakich vučylisia rasijskija hienierały, daviadziecca «śpisvać u archiŭ».
Čytajcie taksama:
U Kramla praz šeść miesiacaŭ mohuć skončycca bajavyja mašyny — Forbes
U baraćbie za inicyjatyvu ŭ vajnie Załužny robić staŭku na bieśpiłotniki
Ukraina ŭžo siońnia moža atrymać ad ZŠA vysokadakładnyja kiravanyja bomby GLSDB — Politico