MZS: Naša vizavaja palityka realizujecca na parytetnaj asnovie ŭ intaresach biełaruskich hramadzian
Ministerstva zamiežnych spraŭ prakamientavała ŭparadkavańnie stavak konsulskich zboraŭ za afarmleńnie ŭjaznych viz u Respubliku Biełaruś.
Vizavaja palityka Respubliki Biełaruś va ŭzajemaadnosinach ź inšymi krainami realizujecca na parytetnaj asnovie.Pra heta havorycca ŭ raspaŭsiudžanym 6 studzienia pres-słužbaj MZS Biełarusi kamientaryi «ŭ suviazi z uparadkavańniem stavak konsulskich zboraŭ za afarmleńnie ŭjaznych viz u Respubliku Biełaruś».
Jak paviedamlałasia raniej, z 1 studzienia 2010 hoda, z ustupleńniem u siłu Asablivaj častki Padatkovaha kodeksa, u Biełarusi «unifikavany padychod da konsulskich zboraŭ z zamiežnych hramadzian». U pryvatnaści,
utraja — z 60 da 180 jeŭra — uzros košt viz, jakija adkryvajucca ŭ Nacyjanalnym aeraporcie «Minsk» hramadzianam z krain, dzie jość biełaruskaje konsulstva. Z 60 da 90 jeŭra ŭzros košt viz dla hramadzian ź dziaržaŭ, dzie biełaruskaha konsulstva niama.
Pradstaŭniki turbiźniesu rezka adreahavali na novaŭviadzieńnie, zajaviŭšy, što padaražańnie viz u aeraporcie pazbaŭlaje ich mahčymaści pracavać z zachodnim rynkam.
«Pry vyznačeńni stavak konsulskich zboraŭ za afarmleńnie viz uličvalisia
ŭ pieršuju čarhu intaresy biełaruskich hramadzian,
umovy dla pajezdak jakich za miažu pavinny być adekvatnyja tym, jakija prymianiajucca ŭ dačynieńni da inšaziemcaŭ biełaruskim bokam», — zaznačajecca ŭ kamientaryi MZS.
Jak patłumačyli ŭ źniešniepalityčnym viedamstvie, da niadaŭniaha času ŭ kožnaj biełaruskaj zamiežnaj ustanovie dziejničaŭ svoj asobny taryf «z ulikam śpiecyfiki dziaržavy znachodžańnia», tamu staŭki zboraŭ značna adroźnivalisia. Pryniaćcie ŭ kancy 2009 hoda Asablivaj častki Padatkovaha kodeksa Respubliki Biełaruś dazvoliła unifikavać staŭki zboraŭ za ažyćciaŭleńnie zamiežnymi ŭstanovami ŭsiaho śpiektra konsulskich dziejańniaŭ, havorycca ŭ kamientaryi.
«Staŭki konsulskich zboraŭ za vydaču biełaruskich viz u biełaruskich zamiežnych ustanovach u pieravažnaj bolšaści vypadkaŭ nie źviedali istotnych źmien», — zajaŭlajuć u MZS Biełarusi.
Tak, staŭka zboru za vydaču adnarazovaj karotkaterminovaj vizy składaje 60 jeŭra, za šmatrazovuju doŭhaterminovuju vizu — 150 jeŭra.
Staŭka zboru za afarmleńnie hrupavoj vizy (ad piaci čałaviek), u tym liku z turystyčnaj metaj, składaje 10 jeŭra z čałavieka. Pry hetym, nahadvajuć u MZS Biełarusi, košt šenhienskaj vizy ŭsich typaŭ dla biełarusaŭ ciapier składaje 60 jeŭra.
U dačynieńni da hramadzian Vialikabrytanii i ZŠA z 1 studzienia prymianiajucca staŭki konsulskich zboraŭ, anałahičnyja staŭkam, što biarucca brytanskim i amierykanskim bakami ŭ dačynieńni da hramadzian Biełarusi: 78 i 100 dalaraŭ ZŠA — za tranzitnuju vizu (biez uliku kratnaści), 114 i 131 dalar ZŠA — za karotkaterminovuju vizu (biez uliku kratnaści),
366 i 350 dalaraŭ ZŠA — za doŭhaterminovuju vizu adpaviedna.
Staŭki zboraŭ na asnovie pryncypu ŭzajemnaści prymianiajucca taksama ŭ dačynieńni da hramadzian Vienhryi, Irana, Kitaja, Malty, Słavakii, Słavienii, Čechii i Turkmienistana. Afarmleńnie viz hramadzianam Sierbii (na termin zvyš 30 sutak) i Japonii robicca biaspłatna ŭ adpaviednaści ź dziejnymi mižnarodnymi pahadnieńniami Biełarusi, paviedamlaje pres-słužba MZS.
«Asabliva treba zaznačyć, što hramadzianam susiednich dziaržaŭ — Łatvii, Litvy, Polščy i Estonii — vizy pa-raniejšamu afarmlajucca pa lhotnych staŭkach, uviedzienych biełaruskim bokam u adnabakovym paradku: 25 jeŭra — za adnarazovuju karotkaterminovuju vizu i 60 jeŭra — za šmatrazovuju karotkaterminovuju vizu», — paviedamlaje MZS.
U suviazi z pavyšeńniem koštu viz u Nacyjanalnym aeraporcie «Minsk», zajaŭlajuć u biełaruskim MZS, varta ŭličyć,
što «ŭ suśvietnaj praktycy ŭ pryncypie vielmi redkija prykłady poŭnamaštabnaha razhortvańnia miechanizmaŭ pa afarmleńni viz u aeraportach».
Da prykładu, u dziaržavach — udzielnicach Šenhienskaha pahadnieńnia i bolšaści inšych viadučych krain śvietu mahčymaść afarmleńnia viz u aeraporcie vyklučana. U šerahu dziaržaŭ u aeraporcie mahčyma atrymańnie tolki dazvołaŭ na karotkaterminovaje znachodžańnie (da piaci dzion), u inšych — tolki turystyčnych viz.
«Afarmleńnie viz u Nacyjanalnym aeraporcie «Minsk» pradyktavana ŭ pieršuju čarhu nieabchodnaściu akazańnia konsulskich pasłuh hramadzianam dziaržaŭ, u jakich adsutničajuć dypłamatyčnyja pradstaŭnictvy i konsulskija ŭstanovy Biełarusi. Pry hetym vydajucca ŭsie typy viz. Jany afarmlajucca na praciahu paŭhadziny i ŭ prysutnaści zamiežnaha hramadzianina. Zrazumieła, što razhortvańnie adpaviednaj infrastruktury ŭ aeraporcie sprava nie tannaja, što, u kančatkovym vyniku, adbivajecca i na kančatkovym košcie vydavanych viz. Usio heta ŭ poŭnaj miery adpaviadaje šyroka prymianialnaj mižnarodnaj praktycy pa terminovym afarmleńni dakumientaŭ», — havorycca ŭ kamientaryi.