Siońnia projdzie tradycyjnaja «Hadzina Ziamli», na budynkach adklučać padśviatleńnie
Tradycyjnaja akcyja «Hadzina Ziamli» projdzie 30 sakavika, u Minsku ŭ hety dzień adklučać padśviatleńnie na budynkach z 20:30 da 21:30, piša ahienctva «Minsk-Naviny».
Zdymak ilustracyjny
Jak udakładnili ŭ Minharvykankamie, u adznačany čas patušać padśviatleńnie samych viadomych budynkaŭ i pomnikaŭ śvietu. Ale havorka idzie nie pra ekanomiju elektryčnaści — heta simvał bieražlivych adnosin da pryrody i napamin, što dapamahčy płaniecie možna, źmianiŭšy svaje zvyčki.
Siarod takich karysnych zvyčak nazyvajuć razumny raschod elektraenierhii i ciapła, ekanomiju vady i vybar na karyść druhasnaj pierapracoŭki papiery i inšych materyjałaŭ.
Biełaruś dałučajecca da «Hadziny Ziamli» z 2009 hoda. U Minsku ŭ hetuju hadzinu tradycyjna adklučajuć padśviatleńnie stadyjona «Dynama», Biełaruskaha dziaržaŭnaha muzieja historyi Vialikaj Ajčynnaj vajny, architekturnaha kompleksu «Varoty Minska», Biełdziaržcyrka i inšych znakavych budynkaŭ.
Prostych ludziej taksama zaklikajuć na adnu hadzinu vyklučyć śviatło i bytavyja elektraprybory — u znak nieabyjakavaści da budučyni płaniety.
Pry hetym arhanizatary akcyi nie rekamiendujuć adklučać vuličnaje aśviatleńnie, aeranavihacyjnyja ahni i śviatłafory ŭ metach biaśpieki.
Čytajcie taksama:
Siońnia nočču Jeŭropa i Ukraina piarojduć na letni čas. Ci treba pieravodzić strełki biełarusam?
U Minsku na paŭhoda zakryjuć jašče adzin most
Žychary paŭdniovaha ŭschodu Minska skardziacca na niepryjemny pach