Łukašenka padaryŭ Ziuhanavu orden na jubilej
20 červienia Łukašenka padpisaŭ ukaz ab uznaharodžańni niaźmiennaha ciaham bolš za 30 hadoŭ lidara rasijskich kamunistaŭ Hienadzia Ziuhanava ordenam Pašany.
Hienadź Ziuhanaŭ uskładaje kvietki da mahiły Iosifa Stalina. Fota: AP Photo/Alexander Zemlianichenko
Ušanavali Ziuhanava «za značny asabisty ŭkład u raźvićcio ŭsiebakovaha supracoŭnictva pamiž Biełaruśsiu i Rasijaj, sajuznaha budaŭnictva, umacavańnie družalubnych adnosin i adzinstva narodaŭ dźviuch krain».
26 červienia lidaru rasijskich kamunistaŭ spoŭnicca 80 hadoŭ, i hetaje jahonaje ŭšanavańnie vidavočna źjaŭlajecca padarunkam da jubileju.
Hienadź Ziuhanaŭ naležyć da liku tych rasijskich palitykaŭ, ź jakimi Łukašenka maje spravu z samaha pačatku svajho prychodu da ŭłady ŭ Biełarusi. Jon uznačaliŭ Kamunistyčnuju partyju Rasijskaj Fiederacyi 14 lutaha 1993 hoda, adrazu paśla taho, jak jaje dazvolili ŭ postsavieckaj Rasii aficyjna adnavić. Z taho času lidary hetaj palityčnaj siły nie mianialisia.
Zorny čas Ziuhanava prypaŭ na 1990-ja, kali na prezidenckich vybarach 1996 hoda jon byŭ hałoŭnym kankurentam Barysa Jelcyna i nie dapuścić jaho da ŭłady ŭdałosia tolki praz chitra arhanizavanuju pieradvybarčuju kampaniju, u jakoj chapała manipulacyj i pramych złoŭžyvańniaŭ. Paśla taho KPRF razam ź jaje lidaram, zachoŭvajučy rolu asnoŭnaj farmalna apazicyjnaj siły ŭ Rasii, pa-surjoznamu na ŭładu bolš nie pretendavali, pahadziŭšysia stać častkaj pucinskaj palityčnaj sistemy.
Čytajcie taksama:
«Adłupcavać — heta my lohka». Pucin abmierkavaŭ ź Ziuhanavym cialesnyja pakarańni
U Minsku prachodzić «antyfašyscki» kamunistyčny forum. Na jaho pryjechaŭ Ziuhanaŭ
Ziuhanaŭ aburyŭsia, što Bajdena, «jaki spatykajecca», pakazvajuć pa TB časta, a pra Brežnieva maŭčać