Dziasiatki ŭkrainskich vajskoŭcaŭ bačać pa načach niezrazumiełyja zialonyja pramiani. Što heta takoje?

Zialonyja pramiani bačyli na roznych učastkach frontu. Adkul jany ŭzialisia i nakolki niebiaśpiečnyja?

Zialonaje śviatło łaziernaha celepaznačalnika Zala Z-16IRQ-V/L. Fota: serhii_flash / Telegram

U apošnija dni ŭ roznych pablikach ukrainskija vajskoŭcy dzielacca paviedamleńniami i zdymkami, na jakich vidać pramiani śviatła zialonaha koleru, jakija ŭnačy śvieciać na pazicyi prosta ź nieba. Časam hety pramień supravadžaje prasoŭvańnie techniki. Usio heta adbyvajecca ŭ absalutnaj cišyni.

Jak vyjaviłasia, zialony pramień — vynik pracy ciepłavizara z kamieraj i łaziernym celepaznačalnikam Zala Z-16IRQ-V/L, jaki ŭstalavany na rasijskich bieśpiłotnikach (chutčej za ŭsio typu Z-16).

Ciepłavizar z kamieraj i łaziernym celepaznačalnikam Zala Z-16IRQ-V/L. Fota: sajt vytvorcy zala-aero.com

Jak piša Defense Express, havorka idzie pra surjoznuju niebiaśpieku. Paśla taho, jak peŭnaje miesca budzie padśviečana, treba čakać naniasieńnia pa im udaru. Łaziernaje padśviatleńnie vykarystoŭvajuć dla naviadzieńnia bojeprypasaŭ z paŭaktyŭnymi łaziernymi hałoŭkami. Heta mohuć być jak artyleryjskija snarady, tak i avijacyjnyja rakiety dy svabodnapadajučyja karektavanyja avijabomby (KABy). Dakładnaść naviadzieńnia nie zaležyć ad srodkaŭ REB, bo snarad lacić u punkt, jaki stvaraje pramień łaziera.

Śpiecyjalisty zaŭvažajuć, što zvyčajna łazierny pramień dla aśviatleńnia celi niabačny ŭ aptyčnym śpiektry, pakolki śpiektr jaho vypramieńvańnia znachodzicca ŭ infračyrvonym dyjapazonie. Čamu ŭ vypadku rasijskich sistem jon bačny, što źjaŭlajecca demaskavalnym faktaram, niezrazumieła.

Hety niedachop stvaraje dadatkovuju niebiaśpieku dla asabovaha składu, jaki, pabačyŭšy dziŭnaje śviačeńnie, pakidaje ŭkryćci, kab lepš jaho razhladzieć.

Kamientary da artykuła