Čempijanat śvietu pa śmiešnych hrymasach prajšoŭ u Anhlii
Karani turniru siahajuć u 1267 hod, kali na kirmašy pradavali vielmi kisłyja jabłyki.
Skrynšot videa SWNS
Čarhovy čempijanat śvietu pa hurninhu, dzie ŭdzielnikam treba zrabić samuju śmiešnuju hrymasu, prajšoŭ na paŭnočnym zachadzie Anhlii, paviedamlaje New York Post.
Štohod u Ehremoncie, hrafstva Kambryja, dziasiatki achvotnych sprabujuć pakazać hrateskny tvar, nadzieŭšy vialiki konski chamut. Pieramožcu vyznačajuć sudździ. Na acenku taksama ŭpłyvajuć apładysmienty i śmiech hledačoŭ.
Skrynšot videa SWNS
U 2024 hodzie čempijonam śvietu ŭ rekordny 19-raz staŭ Tomi Macinsan. Brytaniec adznačyŭ, što jaho pośpiech staŭ vynikam doŭhich trenirovak i hienietyki, bo jaho baćka taksama byŭ čempijonam.
«Ja abaviazkova viarnusia. Ja chaču dasiahnuć 30 pieramoh. Kali ty čempijon, to pavinien viarnucca i abaraniać svoj tytuł», — zajaviŭ Macinsan.
Skrynšot videa SWNS
Siarod žančyn pieramožcaj u vośmy raz zapar stała 37-hadovaja Kłer Lister, jakaja trenirujecca ŭ hurninhu z padletkavaha ŭzrostu.
Ličycca, što turnir zaradziŭsia ŭ Anhlii ŭ 1267 hodzie. Tady na haradskim kirmašy miascovym žycharam razdavali jabłyki. Niekatoryja ź ich byli nastolki kisłymi, što ludzi mižvoli kurčyli hrymasy. Paźniej heta pierarasło ŭ konkurs na samy śmiešny vyraz tvaru.