Paśla pryznačeńnia daty vybaraŭ «ekstremistaŭ» prymušajuć padpisać admysłovuju papieru

Jak stała viadoma «Salidarnaści», paśla pryznačeńnia daty vybaraŭ na 26 studzienia 2025 hoda siłaviki ŭzmacnili kantrol nad raniej asudžanymi pa palityčnych artykułach biełarusami. Usim tym, chto staić na ŭliku ŭ kryminalna-vykanaŭčych inśpiekcyjach jak adbyŭšyja terminy ŭ kałonijach ci na «chimii», vynosicca «aficyjnaje papiaredžańnie», jakoje jany abaviazanyja padpisać.

Fota ilustracyjnaje

Tekst papiaredžańnia davoli doŭhi, u im havorycca «ab niedapuščalnaści dziejańniaŭ pa płanavańni i ździajśnieńni dziejańniaŭ, nakiravanych na hvałtoŭnaje źmianieńnie kanstytucyjnaha ładu, zachop abo ŭtrymańnie dziaržaŭnaj ułady niekanstytucyjnym šlacham» i pieraličanyja inšyja dziejańni, jakija padpadajuć pad vyznačeńnie «ekstremizm» i interpretacyi režymu Łukašenki.

Na słovach supracoŭniki kryminalna-vykanaŭčych inśpiekcyj papiaredžvajuć, što nielha raspaŭsiudžvać «ekstremisckija materyjały», pościć i pierasyłać paviedamleńni z kanałaŭ, pryznanych «ekstremisckimi», «pieraškadžać zakonnaj dziejnaści dziaržaŭnych orhanaŭ», u tym liku vybarčych kamisij.

Akramia taho, pavialičyłasia častata milicejskich pravierak byłych palitviaźniaŭ i «chimikaŭ» doma, u tym liku ŭ načny čas. Možna mierkavać, što taki stan rečaŭ budzie zachoŭvacca ciaham usioj vybarčaj kampanii.

Nahadajem, što ŭsie asudžanyja pavodle kryminalnych artykułaŭ za ŭdzieł u padziejach 2020 hoda i paśla, jašče na etapie śledstva pastaŭlenyja na prafiłaktyčny ŭlik jak «schilnyja da ekstremisckaj i inšaj destruktyŭnaj dziejnaści».

Paśla vyzvaleńnia hetyja ludzi zanosiacca ŭ śpiecyjalny «ekstremiscki» śpis MUS, jaki rassyłajecca ŭ banki, słužby zaniataści, mabilnym apierataram, mytnym orhanam i h. d. Biełarusy, jakija znachodziacca ŭ hetym śpisie, sutykajucca z šeraham abmiežavańniaŭ: im składana ŭładkavacca na pracu, adkryć bankaŭski rachunak i da t. p.

Kamientary da artykuła