U aeraporcie Barsiełony zatapiła terminał i ŭźlotna-pasadačnuju pałasu
Praliŭnyja daždžy ŭ Ispanii praciahvajucca, z Valensii liŭni pieramiaścilisia na paŭnočny ŭschod krainy, u Barsiełonu. U sacyjalnych sietkach źjavilisia videaroliki, na jakich vidać, jak vada zalivaje terminał u aeraporcie Barsiełony El-Prat, piša Euronews.
Mocny doždž pačaŭsia ŭ aeraporcie ranicaj u paniadziełak. Da siaredziny dnia było admieniena 70 rejsaŭ, 17 byli pieranakiravany ŭ inšyja aeraporty.
Nacyjanalnaje mietearałahičnaje ahienctva Ispanii AEMET vypuściła čyrvonaje papiaredžańnie dla Barsiełony, zajaviŭšy pra «nadzvyčajnuju niebiaśpieku z-za praliŭnoha daždžu». Ułady rekamiendavali «ŭstrymacca ad pajezdak, kali ŭ ich niama krajniaj nieabchodnaści».
Barsiełona stała jašče adnym rehijonam Ispanii, paciarpiełym ad ekstremalnych umoŭ nadvorja. U Valensii, dzie kolkaść zahinułych pieravysiła 200 čałaviek, praciahvajucca adnaŭlenčyja i ačyščalnyja raboty.
Apieratar aeraporta Barsiełony Aena zajaviŭ, što ŭ aeraporcie stvorany «kryzisny kamitet» dla baraćby z nastupstvami mocnaha daždžu.
Na sajcie aeraporta bolšaść najbližejšych rejsaŭ skasavanyja abo zatrymanyja jak minimum na hadzinu. Pavodle danych aeraporta, na hety momant admieniena 70 rejsaŭ. Prybyćcio taksama zatrymlivajecca abo admianiajecca, takaja situacyja zachavajecca da viečara.
Čytajcie taksama:
«Zabojcy, preč!» Karaleŭskuju paru ŭ Ispanii zakidali hraźziu
Ad pavodki ŭ Ispanii zahinuli ŭžo 158 čałaviek
U Ispanii abjavili trochdzionnuju žałobu pa achviarach pavodki. Kolkaść achviaraŭ raście