Litoŭskaja mytnia čarhovy raz uskładniła ŭmovy dla tranzitu aŭto z ZŠA ŭ Biełaruś. Jakija aŭto ciapier mohuć zachrasnuć u porcie Kłajpiedy?
Pakupniki aŭto z ZŠA i kampanii-pasiaredniki pačali skardzicca, što litoŭskaja mytnia pierastaje afarmlać aŭtamabili z peŭnych katehoryi.
Ilustracyjny zdymak. Fota: «Naša Niva»
Novyja nieahučanyja abmiežavańni?
Ź siaredziny červienia praź Litvu ŭ Biełaruś možna było vyvozić aŭtamabili sa Štataŭ va ŭzroście da 5 hadoŭ tolki z abjomam ruchavika da 1,9 litra. Elektramabili i hibrydy maładziejšyja za 5 hadoŭ nie vypuskali ŭ Biełaruś, patrabujučy daviedku ad vytvorcy, jakuju de-fakta atrymać niemahčyma.
Kali z momantu vypusku aŭtamabila prajšło bolš za 5 hadoŭ, litoŭskaja mytnia afarmlała taksama aŭto z abjomam ruchavika, bolšym za 1,9 litra, hibrydy i elektramabili.
Adnak ź ciaham času patrabavańni litoŭskaj mytni znoŭ stali bolš strohimi.
Ciapier adzinaja katehoryja aŭto z ZŠA, jakija ŭ Kłajpiedzie afarmlajuć biez prablem i dadatkovych patrabavańniaŭ, — heta mašyny z abjomam ruchavika da 1,5 litra.
Dla afarmleńnia tranzitnaj dekłaracyi na aŭto z abjomam ad 1501 sm³ da 1900 sm³ pačali patrabavać daviedku ad jeŭrapiejskaha dylera z ukazańniem klirensu.
Bieź jaje tranzit u Biełaruś bolš nie afarmlajuć. Kali ŭ daviedcy budzie paznačana, što vyšynia klirensu, praduhledžanaja vytvorcam, pieravyšaje 16,5 sm, to taki aŭtamabil u Biełaruś nie trapić.
Ułasnaje mierkavańnie moža być važniejšaje za daviedku
Pry hetym dekłaranty papiaredžvajuć, što navat najaŭnaść daviedki, u jakoj paznačana, što klirens dazvalaje aformić tranzit, nie harantuje stanoŭčaha rašeńnia, bo litoŭskaja mytnia ŭsio roŭna moža admović u vypiscy tranzitnaj dekłaracyi na svajo mierkavańnie.
Aŭtamabili starejšyja za 5 hadoŭ z abjomam ruchavika, bolšym za 1,9 litra, elektramabili i hibrydy, jakija jašče ŭ pačatku vosieni biez prablem afarmlali na Biełaruś, apošnim časam taksama atrymlivajuć admovu ŭ afarmleńni tranzitu.
Akramia taho, niekatoryja adznačajuć, što schiema z afarmleńniem i vyvazam takich aŭto praz Polšču taksama bolš nie pracuje.
Ilustracyjny zdymak. Fota: «Naša Niva»
Pakupnikam padsankcyjnych aŭto varta rychtavacca da vialikich vydatkaŭ
Kampanii, jakija akazvajuć pasiarednickija pasłuhi pa kupli aŭto z ZŠA, užo pačali prapanoŭvać svaim klijentam, jakija nabyli mašyny starejšyja za 5 hadoŭ, pieranakiroŭvać ich na Hruziju, bo šaniec dastavić takija aŭto praź Litvu mizerny.
Tym nie mienš, peŭnaja kolkaść takich mašyn usio adno nakiroŭvajecca ŭ port Kłajpieda, dzie ź vialikaj vierahodnaściu jany zachrasnuć, jak heta ŭžo było na pačatku leta.
Mašyny, na jakija z tych ci inšych pryčyn litoŭskaja mytnia nie afarmlaje tranzitnyja dekłaracyi na Biełaruś, pakupnikam daviadziecca vyvozić alternatyŭnymi šlachami. A heta dadatkovyja 4,5—6 tysiač jeŭra na łahistyku.
Ilustracyjny zdymak. Fota: «Naša Niva»
Častka biełaruskich kampanij paśla padziej pačatku leta całkam admoviłasia ad pracy z portam Kłajpieda, abhruntavaŭšy takoje rašeńnie tym, što litoŭski port bolš nie vyhladaje nadziejnym partnioram.
Hruzija znoŭ u vyjhryšy?
Takija pieravozčyki pieranakiravali ŭvieś trafik na Hiermaniju, Niderłandy i Hruziju. Vyhladaje, što mienavita Hruzija ciapier zastajecca najbolš pradkazalnym kirunkam, choć dastaŭka praz hetuju krainu abychodzicca na 1500—2000 dalaraŭ daražej, čym praź Litvu.
Admietna, što Hruzija zabaraniła reekspart padsankcyjnych aŭto z ZŠA ŭ Rasiju i Biełaruś jašče letam 2023 hoda. Ale zabarona nosić chutčej farmalny charaktar. Naturalna, što hruzinskaja mytnia nie afarmlaje dakumienty na pakupnikoŭ z RB i RF. Heta robicca praz padstaŭnych hramadzian i kampanii z trecich krain, takich jak Azierbajdžan, Kazachstan ci Kyrhyzstan.
Vyhladaje, što z padobnaj źjavaj tam nie zmahajucca i zmahacca nie źbirajucca, bo zakryćcio vačej na vykanańnie ŭviedzienych samoj Hruzijaj abmiežavańniaŭ dazvalaje krainie i biznesu atrymlivać z hetaha dobryja dyvidendy.