Jarmošyna raskazała, jak apazicyja nibyta sprabavała jaje padkupić
«My tančyli z Hienadziem Karpienkam i ja adkazała jamu słovami Taćciany Łarynaj: «Ja inšamu addadziena i budu viek jamu viernaja».
Lidzija Jarmošyna. Skryn videa: CTVBYvideo / YouTube
Byłuju kiraŭnicu Centralnaj vybarčaj kamisii ŭ efiry STB spytali, ci byli sproby jaje padkupić. U adkaz jana raskazała historyju, jakaja nibyta adbyłasia pierad prezidenckimi vybarami 2001 hoda.
«Nie viedaju, ci była heta sproba. Vybary 2001 hoda, pierad imi, kali jašče mianie zaprašali ŭ Jeŭropu, vučyli mianie. I ŭvieś čas z pradstaŭnikami apazicyi.
Ja pamiataju, my pajechali takoj delehacyjaj pa zaprašeńni adnaho z deputataŭ finskaha parłamienta. Tam było try pradstaŭniki apazicyi i try pradstaŭniki ŭłady. I voś z boku apazicyi heta byli ŭžo ciapier niabožčyk Hienadź Karpienka, druhi taksama ŭžo niabožčyk taksama kandydat u prezidenty, Siamion Domaš i kiraŭnica Biełaruskaha Chielsinskaha kamiteta Taćciana Proćka.
(Imavierna, havorka viadziecca pra 1998 ci 1999 hod, bo Hienadź Karpienka pamior u 1999 hodzie pry zahadkavych abstavinach — NN).
Ja pamiataju, my z Karpienkam navat tančyli pavolnyja tancy na adnoj viečaryncy tam u Finlandyi. I jon mnie tak žartaŭliva kaža: «Jarmošyna, cikaviacca, kolki Vy kaštujecie?»
Nu, pakolki ŭ nas adnosiny byli vielmi viasiołyja i žartaŭlivyja, mnie samoj spadabaŭsia moj adkaz. Ja skazała: «Hienadź Dźmitryjevič, jak amataru paezii (jon da hetaha vieršy čytaŭ), ja vam adkažu słovami Taćciany Łarynaj: «Ja inšamu addadziena i budu viek jamu viernaja».
Jarmošyna śćviardžaje, što bolš z takimi pytańniami da jaje nie padychodzili:
«Užo ŭsie zrazumieli dosyć chutka, musić, paśla 2001 hoda, što sa mnoj kašu nie zvaryš. Ad mianie adlipli i zamiežnyja pasły».
Čytajcie taksama:
«Jana jaho šantažavała». Novyja detali apošnich dzion žyćcia syna Jarmošynaj
Łohika Jarmošynaj: Treba iści na vybary, kab Łukašenku pavažali ŭ Kitai
Jarmošyna: Pretendenty ŭ 2020 — vyradki. A ja ŭratavała krainu ad hramadzianskaj vajny