U Maskvie aŭtainśpiektary stvaryli «žyvy ščyt» pry zatrymańni niebiaśpiečnych złačyncaŭ
Apieracyja pravaliłasia. Jana amal adzin u adzin nahadvaje zatrymańnie Ramana Mienciuka pad Minskam 2 sakavika 2008 h.
Apieracyja pravaliłasia. Jana amal adzin u adzin nahadvaje zatrymańnie Ramana Mienciuka pad Minskam 2 sakavika 2008 h.
Supracoŭniki DIBDR u Maskvie vykarystoŭvali aŭtamabilistaŭ u jakaści žyvoha ščyta pry sprobie zatrymać złačyncaŭ na MKAD. Apieracyja pravaliłasia. Paciarpiełym aŭtaŭładalnikam milicyjanty skazali, što kampiensacyj za paškodžanyja mašyny nichto nie atrymaje. Staličnaja aŭtainśpiekcyja abiacaje razabracca.
Maskvič Stanisłaŭ Suciahin apublikavaŭ u internecie videazvarot, u jakim raspavioŭ, jak jaho razam ź inšymi aŭtamabilistami milicyjanty vykarystoŭvali ŭ jakaści «žyvoha ščyta» pry sprobie zatrymańnia złačyncaŭ.
Stanisłaŭ Suciahin paviedamlaje nastupnaje: «5 sakavika ja sa znajomym, ruchajučysia pa MKAD z boku Ščołkaŭskaj šašy ŭ napramku Jarasłaŭskaj šašy na aŭtamabili Mercedes, nie dajazdžajučy da Jarasłaŭskaha, ubačyŭ niekalki mašyn DPS. Naš aŭtamabil ruchaŭsia ŭ krajnim levym šerahu, i kali nam prasihnalili spynicca, my heta zrabili. Inśpiektary paprasili mianie pastavić mašynu troški bokam. Toje ž samaje pa ich prośbie zrabili i inšyja aŭtamabilisty. Litaralna praź niekalki chvilin, źlohku prataraniŭšy mianie i čornuju «Vołhu», jakaja stajała pobač, praniesłasia sierabrystaja Audi. Paśla čaho supracoŭniki milicyi sieli ŭ svaje mašyny i praciahnuli pieraśled.
Inśpiektar zabrali ŭ kiroŭcaŭ dakumienty, paviedamiŭšy, što atrymać ich možna na stacyjanarnym pastu. Tam jany daviedalisia, što pravodziłasia śpiecapieracyja: zatrymlivali asabliva niebiaśpiečnych uzbrojenych złačyncaŭ. Suciahin zadaje pytańnie: «Ja ž moh zahinuć. Mahli zahinuć inšyja ludzi. A što kali b złačyncy spynilisia i pačali stralać? Niaŭžo naša žyćcio ničoha nie kaštuje?»
Jak adznačaje Suciahin, inśpiektary nie prasili vadzicielaŭ vyjści z aŭtamabilaŭ i ničoha nie tłumačyli. Pa słovach kiroŭcy, za čornaj «Vołhaj» stajała jašče adna, biełaja, vadziciel jakoj vioz u radzilny dom ciažarnuju žančynu. Ad udaru biełaja «Vołha» taksama paciarpieła.
«Paśla zdareńnia supracoŭniki DIBDR nam prama skazali: «Chłopcy, vy kampiensacyi nie atrymajecie — aŭtamabil złačyncaŭ zatrymany nie byŭ. A što my prasili vas spynicca — nu dyk što?» Tamu asabista ja dla siabie vyrašyŭ: kali pierada mnoj jašče raz paŭstanie takaja situacyja, ja spyniacca nie budu. Štraf za heta — usiaho trysta rubloŭ. Ramont mašyny značna daražej, a čałaviečaje žyćcio naohuł ceny nie maje», — kaža paciarpieły kiroŭca.
Pradstaŭnik pres-słužby DIBDR Maskvy Maksim Hałuška paviedamiŭ «Hazietie.Ru», što pra incydent u inśpiekcyi daviedalisia sa ŚMI. «My raźbirajemsia», — paviedamiŭ jon. Na momant publikacyi paćvierdžańnia abo abviaržeńnia fakta stvareńnia «žyvoha ščyta» atrymać pakul nie ŭdałosia.
Raniej taki vypadak byŭ zafiksavany tolki adnojčy — 2 sakavika 2008 hoda ŭ Biełarusi. Dla zatrymańnia pjanaha kiroŭcy inśpiektary DPS u Minsku spynili niekalki mašyn na šlachu parušalnika i zabaranili ich vadzicielam pakidać aŭtamabili. Paśla taho vypadku inśpiektary byli adchilenyja ad słužby i pajšli pad sud.
Kiraŭnik maskoŭskaha adździaleńnia Fiederacyi aŭtaŭładalnikaŭ Rasii Siarhiej Kanał adznačaje: «Na Dźmitraŭskaj šašy kala paŭtara hoda tamu ŭžo była sproba stvaryć žyvy ščyt z kiroŭcaŭ. Na ščaście, vadzicieli, niahledziačy na pahrozy kanfiskacyi pravoŭ, admovilisia ŭstavać upopierak darohi. Ja tady rekamiendavaŭ udzielnikam incydentu skardzicca ŭ prakuraturu, papiaredziŭšy, što «heta paŭtorycca». Jany vyrašyli nie skardzicca — i heta paŭtaryłasia».