Azaronak raskazaŭ, jak čałavieka, jaki šturchanuŭ jaho maci-kanduktarku ŭ aŭtobusie, adpravili ŭ izalatar
Prapahandyst raskazaŭ bolej pra svaju maci i pra toje, što da 27 hadoŭ žyŭ z baćkami, bo zarobku na zdymnuju kvateru nie chapała.
Ryhor Azaronak. Skryn videa: sobchak / YouTube
Baćka Ryhora Azaronka — Juryj Azaronak — byŭ adnym z samych adyjoznych prapahandystaŭ BT. Pra maci ž było viadoma tolki toje, što jana pracuje kanduktarkaj u hramadskim transparcie.
U intervju Ksienii Sabčak Azaronak raskazaŭ pra maci bolej. Jana ŭsio žyćcio adpracavała na Kamaroŭskim rynku, a na piensii, kab nie sumavać, pajšła kantraloram-kanduktaram.
Adnojčy ŭ aŭtobusie čałaviek paznaŭ jaje proźvišča na bejdžyku i, raskazvaje Azaronak, pichnuŭ jaje.
«Jana ŭ šoku pazvaniła mnie. Ja, pa-mojmu, niejkuju natatku cisnuŭ u telehram-kanał. A dalej pajechaŭ tudy, na miesca. Raźbiracca. (…) Potym pa kamierach u aŭtobusie vyličyli, znajšli. Usio, jak pałožana pa pracedury», — pryhadaŭ akaličnaści Azaronak.
Taho čałavieka z aŭtobusa pasadzili ŭ śledčy izalatar. Historyja dajšła da Łukašenki.
«Nu i adpaviedna, prezident tady skazaŭ: «Voś niachaj jon z maci pojdzie tudy ŭ izalatar. Kali jany jaho prabačać, to tady čałavieka prabačać, adpuściać. (Atrymaŭ, niejkija sutki pa-minimumu). Kali nie prabačać, pajedzie na poŭnuju katušku». Prezident, pa-mojmu, pra heta raskazvaŭ.
I sapraŭdy, ja tady sustrakaŭsia ź ministram unutranych spraŭ, z pres-sakratarom prezidenta. Z majoj maci sustrelisia ŭ adnoj z ustanoŭ, abhavaryli. My jaho prabačyli, i adpaviedna, z čałaviekam… Nie viedaju, što dalej było. Ale. Značyć usio dobra», — raskazaŭ prapahandyst.
Pa słovach Azaronka, Łukašenka tady skazaŭ jamu, što daremna prabačyŭ.
«Voś, ździejśniŭ pamyłku. Dalej ja hetuju pamyłku vypraŭlaju. I spraŭna pišu, kali znachodziać niejkich ludziej, jakich biaruć za źniavahu, raźmiaščeńnie maich asabistych źviestak, fatahrafavańnie mianie, jašče niečaha. To spraŭna pišu zajavu. I jany adpraŭlajucca asvojvać novuju prafiesiju».
Azaronak raskazaŭ taksama, što da 27 hadoŭ žyŭ z baćkami. Źjechaŭ jon ad ich u 2021-22 hodzie. Raniej zarobku STB nie chapała, kab zdymać kvateru.
Čytajcie taksama:
Papularny rasijski Z-kanał vykazaŭ sumnievy ŭ psichičnym zdaroŭi Azaronka
«Dalaraŭ stolki, što choć piečku imi pali». Azaronak na kamieru spaliŭ kupiuru ŭ 1 dalar
Azaronak raskazaŭ, jak u pačatku vajny prysutničaŭ na zakrytaj naradzie Rady biaśpieki