Vyjšła na volu nastaŭnica Alena Stachiejka
Žančynu prysudzili raniej da hoda kałonii pa 342 artykule, paviedamlaje telehram-kanał «Doŭhaja daroha dadomu».
Alena Stachiejka vykładała biełaruskuju movu ŭ Baranavičach. Jana vychavała šmat pieramožcaŭ alimpijad i 100-balnikaŭ.
«Rašeńnie zdavać centralizavanaje testavańnie mienavita pa biełaruskaj ja pryniała letaś. U 11 kłasie hety pradmiet pryjšła vieści da nas Alena Lavonaŭna Stachiejka. Nastaŭnik vielmi mocny, i ja była ŭpeŭniena, što jana mianie dobra padrychtuje», — kazała pra žančynu adna ź jaje vučanic.
Pakarańnie Alena Stachiejka adbyvała ŭ homielskaj kałonii, dniami jana vyjšła na volu.