Premjer Sierbii padaje ŭ adstaŭku na fonie pratestaŭ
Premjer-ministr Sierbii Miłaš Vučavič razhladaje mahčymaść adstaŭki na fonie praciahłych masavych pratestaŭ, vyklikanych abrušeńniem dachu čyhunačnaha vakzała ŭ Novi-Sadzie ŭ listapadzie 2024 hoda, u vyniku jakoha zahinuli 15 čałaviek.
Foto: Ministarstva odbranie i Voјskie Srbiј
Pratestoŭcy abvinavačvajuć ułady ŭ karupcyi i patrabujuć adstaŭki premjer-ministra i mera Novi-Sada. Raniej, u listapadzie 2024 hoda, ministr budaŭnictva, transpartu i infrastruktury Sierbii Horan Viesič padaŭ u adstaŭku paśla trahiedyi ŭ Novi-Sadzie.
Vučavič zajaviŭ, što hatovy syści ŭ adstaŭku, kali heta dapamoža stabilizavać situacyju ŭ krainie. Čakajecca, što kančatkovaje rašeńnie budzie pryniataje paśla kansultacyj z prezidentam Alaksandram Vučyčam i inšymi členami ŭrada.
Pratesty ŭ Białhradzie i inšych haradach Sierbii praciahvajucca ŭžo bolš za miesiac. Jany pačalisia paśla trahiedyi ŭ horadzie Novi-Sad na poŭnačy Sierbii. Tam 1 listapada praz padzieńnie dachu na čyhunačnym vakzale zahinuli 15 čałaviek.
Studenty pieršapačatkova zapatrabavali prazrystaha rasśledavańnia trahiedyi i pryciahnieńnia da adkaznaści vinavatych. Studenty, jakich padtrymlivajuć aktyvisty apazicyi i pradstaŭniki hramadzianskaj supolnaści, ličać adkaznymi za toje, što zdaryłasia ŭłady, abvinavačvajučy ich u karupcyi, jakaja i pryviała da niajakasnaha ramontu budynka vakzała.
Paśla taho, jak ułady, na dumku ŭdzielnikaŭ akcyj pratestu, nie prysłuchalisia da ich patrabavańniaŭ, pačali vyłučacca i palityčnyja patrabavańni, u pryvatnaści ab stvareńni pierachodnaha ŭrada, jaki padrychtavaŭ by svabodnyja daterminovyja vybary ŭ parłamient. Dla mnohich udzielnikaŭ pratestaŭ trahiedyja ŭ Novi-Sadzie stała paćviardžeńniem taho, što, na ich dumku, urad i prezident Alaksandr Vučyč viaduć krainu pa niapravilnym šlachu.
Paśla sieryi masavych mitynhaŭ u minułuju piatnicu byŭ arhanizavany ŭsieahulny strajk, da jakoha dałučylisia navučalnyja ŭstanovy i kala 200 kampanij pa ŭsioj krainie. U vychodnyja ŭ Białhradzie i inšych haradach znoŭ prajšli maršy pratestu.
Učora studenty pierakryli ŭ Białhradzie aŭtamahistral, a fiermiery padahnali traktary.
Jašče ŭ śniežni zabłakavanaja praca bolš za 50 fakultetaŭ čatyroch dziaržaŭnych univiersitetaŭ, a taksama dziasiatkaŭ siarednich škoł.