Valfovič: Biełaruś nie pahražaje ni Polščy, ni krainam Bałtyi

Dziaržsakratar Rady biaśpieki Biełarusi abvierh zajavy Uładzimira Zialenskaha.

Alaksandr Valfovič. Fota: BiełTA

Raniej prezident Ukrainy Uładzimir Zialenski zajaŭlaŭ, što letam ci vosieńniu 2025 hoda Rasija budzie sprabavać niepasredna ŭciahnuć Biełaruś u vajnu. Metaj pravakacyi, na jaho dumku, moža stać Polšča abo bałtyjskija krainy.

Z abviaržeńniem takoj mahčymaści ŭ navinavym efiry telekanała «Biełaruś 1» vystupiŭ Dziaržaŭny sakratar Rady biaśpieki Biełarusi Alaksandr Valfovič.

«My nie pahražajem nie tolki Ukrainie, ale i nikomu ŭvohule. Jon (Zialenski) pačaŭ pałochać našych susiedziaŭ — Polšču, krainy Bałtyi, zajaŭlajučy, što ŭ Biełaruś uvojdzie čarhovy rasijski kantynhient i budzie stvorany niejki ŭdarny kułak.

Ale navošta? Palityka Rasii i Biełarusi nie nakiravanaja na zavajavańni ci pretenzii. I pierš čym pačynać niejkija ahresiŭnyja dziejańni, zaŭsiody vyłučajucca palityčnyja patrabavańni.

Nakolki nam viadoma, ni Rasija, ni Biełaruś nie vystavili ni Polščy, ni Bałtyi ani palityčnych, ani ekanamičnych patrabavańniaŭ», — zajaviŭ Alaksandr Valfovič.

Dziaržsakratar adznačyŭ, što ŭsie zapłanavanyja i praviedzienyja ŭ Biełarusi mierapryjemstvy źjaŭlajucca całkam adkrytymi i prazrystymi. Pavodle jaho słoŭ, ich maštab značna mienšy ŭ paraŭnańni z tym, što adbyvajecca na terytoryjach zhadanych susiednich dziaržaŭ.

«My nie budujem palihony za 15 km ad dziaržaŭnaj miažy. Tak, u nas jość palihony, što zastalisia z časoŭ Savieckaha Sajuza, ale my nie pašyrajem infrastrukturu i nie pavialičvajem kolkaść vojskaŭ», — dadaŭ jon.

Valfovič pasprabavaŭ abvinavacić u pošuku tryhieraŭ dla dalejšaj eskałacyi ŭkrainskaha lidara. Adkazvajučy na pytańnie, ci moža abvastreńnie abstanoŭki zychodzić z terytoryi Biełarusi, dziaržsakratar Rady biaśpieki zajaviŭ: «Absalutna nie».

Kamientary da artykuła