Pavieł Łatuška vystupiŭ u padtrymku Uładzimira Zialenskaha

Kanfliktnuju situacyju pamiž prezidentam Ukrainy Uładzimiram Zialenskim i prezidentam ZŠA Donaldam Trampam, jakaja adbyłasia siońnia ŭ Biełym domie, nie pakinuŭ pa-za ŭvahaj kiraŭnik Nacyjanalnaha antykryzisnaha ŭpraŭleńnia, namieśnik kiraŭnicy Abjadnanaha pierachodnaha kabinieta Pavieł Łatuška. Jon vystupiŭ u padtrymku Zialenskaha i ŭkrainskaha naroda.

Pavieł Łatuška. Skrynšot ź videa

Spačatku Łatuška napisaŭ post u padtrymku Zialenskaha i Ukrainy ŭ sacsietcy X:

«Ukraina — heta Jeŭropa. Pryjšoŭ čas Jeŭropie stać mocnaj».

Paśla ž jon taksama zapisaŭ karotki videazvarot:

«U hety važny histaryčny momant chacieŭ by vykazać jak biełarus, jak biełaruski palityk słovy padtrymki i salidarnaści ŭkrainskamu narodu, prezidentu Ukrainy Uładzimiru Zialenskamu. Ukraina — heta Jeŭropa, a Jeŭropa pavinna być mocnaj. I ja vieru ŭ toje, što Biełaruś taksama budzie ŭ Jeŭropie», — zajaviŭ palityk.

Paźniej u sacsietkach Łatuški źjaviłasia jašče adno paviedamleńnie ŭ padtrymku Zialenskaha.

«Prezidentu Ukrainy Uładzimiru Zialenskamu nie patrebnaja dapamoha prezidenta ZŠA Donalda Trampa, kab addać Rasii akupavanyja terytoryi Ukrainy, skaracić vojski, admovicca ad ustupleńnia ŭ NATA i denacyjanalizavać Ukrainu. Kali b jon chacieŭ kapitulavać, to pajechaŭ by ŭ Maskvu, a nie ŭ Vašynhton», — ličyć Pavieł Łatuška.

28 lutaha prezidenty Ukrainy i ZŠA mocna pasvarylisia ŭ žyvym efiry, paśla čaho nastupnyja pieramovy i pres-kanfierencyja pa ich vyniku byli admienienyja, a Zialenski byŭ vymušany pakinuć Bieły dom.

Kamientary da artykuła