Stała viadoma, kudy pajšoŭ na pracu adstaŭleny staršynia Śledčaha kamiteta Ivan Naskievič

Jak vyjaviłasia, ciapier jon rabotnik kampanii «Tech end Biznes Salušens». Za hetaj małaviadomaj nazvaj chavajecca skandalny biznes.

Ivan Naskievič

U sakaviku 2021 hoda Ivana Naskieviča adpravili ŭ adstaŭku z pasady staršyni Śledčaha kamiteta. 

Jaho ličyli pradstaŭnikom libieralnaha kryła siłavikoŭ. Śledčy kamitet pad kiraŭnictvam Naskieviča źbiraŭ fakty katavańniaŭ na Akreścina. Na adnoj z naradaŭ Łukašenki ź siłavym błokam jon nibyta navat zajaviŭ pra najaŭnaść materyjałaŭ, dastatkovych dla zaviadzieńnia kryminalnych spraŭ ab pieravyšeńni paŭnamoctvaŭ siłavikami. Adnak chodu hetaj inicyjatyvie nie dali. Pa adnoj ź viersij, na hetym momancie tahačasny ministr unutranych spraŭ Juryj Karajeŭ zajaviŭ, što «kali choć na adnaho supracoŭnika budzie zaviedziena kryminalnaja sprava, to sa ščytami buduć stajać supracoŭniki Śledčaha kamiteta».

Razam z tym ličycca, što mienavita Naskievič, sprabujučy dakazać svaju viernaść, prapanavaŭ ideju zavodzić kryminalnyja spravy na absalutna ŭsich udzielnikaŭ akcyj pratestu.

Nijakuju inšuju dziaržaŭnuju pasadu jon tak i nie atrymaŭ. Jak «Kibierpartyzany» paviedamili «Našaj Nivie», Naskievič byŭ biespracoŭnym da 2023 hoda, a paśla ŭładkavaŭsia ŭ kampaniju «Tech end Biznes Salušens».

Heta jurydyčnaja asoba kiruje chołdynham 1AK-Group, samy viadomy biznes jakoha — skandalny akumulatarny zavod pad Brestam.

Miascovyja žychary i hramadskaść byli kateharyčna suprać takoj budoŭli. Datu zapusku zavoda ŭvieś čas adkładali z-za pratestaŭ. Alaksandr Łukašenka ŭ 2020-m asabista abiacaŭ pravieści miascovy refierendum nakont akumulatarnaha zavodu. Adnak refierendumu tak i nie adbyłosia. Zavod pačaŭ pracu ŭ 2021-m.

Zasnavalnik 1AK-Group — adzin z samych bahatych ludziej Pinska Viktar Lemiašeŭski. I dla Naskieviča heta vidavočna nie čužy čałaviek.

Sam Naskievič pachodzić sa Stolinskaha rajona, ale doŭhi čas byŭ prakuroram Pinskaha rajona i Bresckaj vobłaści — rehijonaŭ, u jakich i robić biznes Lemiašeŭski. A katedž Naskieviča ŭ Pinsku znachodzicca praz darohu ad doma Lemiašeŭskaha, jany susiedzi.

Kali ž Lemiašeŭskaha ŭrešcie aryštavali ŭ 2018-m, to pa linii KDB, a nie Śledčaha kamiteta (jaki na toj momant užo ŭznačalvaŭ Naskievič). Biznesmien tady zapłaciŭ vykup i vyjšaŭ na svabodu, ale jamu daviałosia padzialicca i akumulatarnym biznesam.

Ciapier Lemiašeŭski razam sa svaim partnioram Alaksandram Papkom vałodaje 40% akumulatarnaha zavoda. Jašče 40% kantraluje nabližany da Alaksandra Łukašenki Dźmitryj Baskaŭ. Rešta zastałasia Bresckamu abłvykankamu.

Jakuju pasadu zajmaje ŭ «Tech end Biznes Salušens» Ivan Naskievič, nieviadoma.

Ivan Naskievič naradziŭsia 25 sakavika 1970 u vioscy Cierabličy Stolinskaha rajona. Skončyŭ Ukrainskuju dziaržaŭnuju jurydyčnuju akademiju (1995) pa śpiecyjalnaści «pravaznaŭstva», Paleski dziaržaŭny ŭniviersitet (2006) pa śpiecyjalnaści «ekanamist», Akademiju kiravańnia pa śpiecyjalnaści «dziaržaŭnaje budaŭnictva».

U 1995—2015 pracavaŭ u orhanach prakuratury. U 2007—2012 — prakuror Pinskaha rajona, u 2012—2015 — prakuror Bresckaj vobłaści. Ź listapada 2015 pa sakavik 2021-ha — staršynia Śledčaha kamiteta. Paśla hetaha dva hady (da 2023 hoda) Ivan Naskievič nidzie aficyjna nie byŭ uładkavany. 

Kamientary da artykuła