U Biełarusi zafiksavali pieršuju sioleta navalnicu
Pieršuju navalnicu 2025 hoda zafiksavali ŭ Viciebsku 4 sakavika. Jana zdaryłasia kala 23-j hadziny i supravadžałasia zalevaj, hrymotami, małankami i hradam dyjamietram 6 mm.
Zdymak ilustracyjny. Fota z sacyjalnych sietak
Takaja ž situacyja była zafiksavanaja na mietearałahičnaj stancyi Jeziaryšča ŭ Haradockim rajonie.
Sinoptyki tłumačać takuju rańniuju sioletniuju navalnicu anamalna ciopłym nadvorjem. Siaredniesutačnaja tempieratura na Viciebščynie ciapier pieravyšaje normu na 6 hradusaŭ.
«Pryčyna sakavickaj navalnicy — u vysokaj niaŭstojlivaści ŭ atmaśfiery, źviazanaj z prachodžańniem chałodnaha atmaśfiernaha frontu, jaki pryjšoŭ na terytoryju našaj krainy z Prybałtyki», — paviedamili ŭ «Viciebskabłhidramiecie».
Z 1936 hoda sakavickija navalnicy ŭ Biełarusi fiksavali tolki dziesiać razoŭ.
Čytajcie taksama:
Da piatnicy paciapleje da +14—17°S, u tym liku ŭ Minsku